Andrias Magnussen er valdur til nýggjan formann í valnevndini í Nes kommunu, eftir at nývalda nevndin hevur skipað seg.
Tað var á býráðsfundi í kommununi hin 26. mai, at nýggj valnevnd varð vald. Eftir hvørt kommunuval, skal valnevndin veljast av nýggjum.
Býráðið gjørdi av at velja hesi umboð: Andrias Magnussen, Elsu í Hjøllum, Vilmund D. Jacobsen, Álv Højgaard og Onnu Malenu Højgaard.
Varalimir eru: Rúna Olsen, Petur Gaardlykke og Jaspur Højgaard.
- Valnevndin skipar seg sjálv, tó sigur lógin, at býráðið velur forfólkið til valnevndina til Fólkatingsval, siga tey í Nes kommunu í dag.
Nývalda valnevndin hevði herfyri skipanarfund, og Andrias Magnussen varð valdur til formann.
Á fundi hin 23. juni samtykti byráðið eisini at velja Andrias Magnussen til formann í valnevndina til fólkatingsval.
Vit kunnu leggja aftrat, at Andrias Magnussen tekur stafettina sum formaður eftir pápa sín.
Pápin er Ólavur Magnussen, og hann hevur sitið í valnevndini í fleiri ár, har hann hevur gjørt eitt framúr gott og ábyrgdarfult arbeiði.
##med2##
