Annað hvørt ár er tað FM kappróður á Varmakeldustevnu í Fuglafirði. Í vikuskiftinum var Varmakeldustevna í Fuglafirði, men hesa ferð var eingin kappróður á skránni.
Álitið í ítróttinum fyri við góðum avriki á stevnuni at syrgja fyri góðum stevnuhýri í Fuglafirði varð lagt á besta fótbóltsliðið hjá ÍF. Leingi sá tað út til, at tað skuldi eydnast, men í síðstu løtu meiri enn hálvkiksaði tað.
Erla Kongsdóttir við kvinnumanning var ikki á stevnu í Fuglafirði fyrrenn út á kvøldið. Tá ið grøni báturin við væl trimmaðu manningini kom inn um Dalarnar í bili, varð stevnuhýrurin lyftur upp.
Kvinnurnar á Erlu Kongsdóttir høvdu verið á aðrari stevnu – í Vestmanna – og vunnið gull og harvið styrkt um vánirnar fyri, at tað skal eydnast fuglfirðingum at vinna FM í kappingini millum 5-mannafør við kvinnum.
Fimm bátar luttóku í hesi kappingini. Havfrúgvin og Blikur kappaðust um at sleppa undan aftasta plássinum. Ta kappingina vann Havfrúgvin við einari bátslongd.
Í hinum endanum vóru tríggir bátar við í kappingini um sigurin. Bæði Drekin og Firvaldur bjóðaðu seg fram beinanvegin, og leingi var tað tætt og spennandi.
Men í endaspurtinum var einki at rafla um. Erla Kongsdóttir tók seg stútt og støðugt frá kappingarneytunum, og tá ið grøni bátuin fór um málið, var hann meiri enn hálva bátslongd frammanfyri Firvald, sum var skutin frammanfyri Drekan.
Erla Kongsdóttir er fimm stig frammanfyri Drekan, sum er næstfremstur í FM kappingini, og tí ber illa til at ímynda sær annað, enn at Erla Kongsdóttir á Ólavsøku fer at taka ímóti FM steypinum, hóast sigurin hesa ferð ikki var eins sannførandi, sum hann hevur verið tær seinastu ferðirnar.
1 Erla Kongsdóttir 05:06.20
2 Firvaldur 05:08.22
3 Drekin 05:09.02
4 Havfrúgvin 05:20.11
5 Blikur 05:23.01
Støðan
1 Erla Kongsdóttir 34
2 Drekin 29
3 Firvaldur 26
4 Blikur 20
5 Havfrúgvin 16
