Seinastu árini eru bátafeløg stovnað kring landið. Hetta er ein gongd, eftir at bátar, sigling og sosial samvera er vorðið ein afturvendandi partur av summarhálvuni.
Bátastevna er á Toftum tíðliga í mai, og í endanum av mai er bátastevna í Vestmanna. Í Hvalvík skipa tey fyri bátahugna, og um heystið er regattasigling í Sundalagnum.
Haraftrat savnast bátaeigarar til felags tiltøk og aðrar stevnur, og tá ovastevna verður hildin, plaga nógv fólk - alt eftir, hvussu veðrið roynist - at leita sær út til Nólsoyar í báti.
Nú ætla fólk í Eysturkommunu eisini at stovna eitt bátafelag fyri bátaeigarar í kommununi. Lýst er til stovnandi fund á Lista-og Bátasavninum í Leirvík.
- Stovnandi fundurin verður leygarkvøldið 16. januar klokkan 19, har øll bátaáhugað eru vælkomin, verður sagt á heimasíðuni hjá Eysturkommunu.
