Í løtuni liggja tvey frystilínuskip og bíða eftir landing. Pison, sum er komin av Flemish Kap, liggur í Klaksvík, og tað ger Polarstjørnan, sum er komin úr Grønlandi, eisini.  

Verkfallið ger, at skipini sleppa ikki at landa fiskin, tey hava í lastini. Ein frystilast er júst sum ein frystiboks, har tað legst ísur á kølingina, sum ger, at kølingin versnar, og kuldin í lastini minkar.

Fer kuldin í lastini niður um 18 stig, kann fiskurin sambært løggildingini, sum skipini hava, ikki seljast sum mannaføði.

Tað hevur ljóðað, at teir eru farnir at landa Pison, men formaðurin í Felagnum Línuskipum, Hálvdan Gudmundsen, heldur ikki, at hetta er so, tí feløgini í verkfalli hava ikki viljað givið undantøk til landing.

- Pison og Polarstjørnan hava nú ligið tað mesta av einari viku og bíðað. Leygardagin, sum er í morgin, kemur frystilínuskipið Eivind, og síðan koma frystilínuskipini, Jógvan I og Sandshavið, mánadagin, allir koma av Flemish Kap.

Formaðurin í Felagnum Línuskip vísir á, at flestu skip eru full undir lúkurnar, og tí hava tey ongan møguleika at draga túrin út. Hetta er alt toskur, og talan er um virðir á fleiri milliónir.

- Sandshavið var í Grønlandi og undir Føroyum, áðrenn teir fóru yvir á Flemish Kap, tí teir høvdu ikki fingið landað í Føroyum kortini. Frystilínuskipið Jákup B er nú eisini á veg yvir á Flemish Kap.

Hálvdan Gudmundsen vísir á, at tað er heldur eingin møguleiki hjá frystilínuskipunum at landa uttanlands. Lógin sigur, at tú í einum ári bert kanst landa 15 prosent av einum fiskaslagi uttanlands.

- Tá tað er so lítil toskur at fáa undir Føroyum og frystilínuskipini, sum eru komin og tey, sum koma leygardagin og mánadagin, næstan bara hava tosk, koma tey at bróta lógina, um tey fara uttanlands við einari so stórari last av toski.

Hann sigur, at í Fiskimálaráðnum vilja tey heldur ikki geva frystilínuskipunum undantak frá regluni um hámarkið á 15 prosent.

- Vanligi kuldin í einari frystilast liggur úr 26 kuldastigum og niður móti 22-24 kuldastigum. Tá lastin kemur niður móti teimum 18 kuldastigunum, er neyðugt at gera okkurt, tí tá byrjar tað at gerast kritiskt.

Hálvdan Gudmundsen sigur, at skipini hava ikki loyvi at landa fisk, sum liggur frystur við minni enn 18 kuldastigum. Lastirnar eru sjálvsagt tryggjaðar, men hann veit ikki, um tryggingin tekur við í slíkum føri.

- So, hetta kann gerast ein rættiliga stórur trupulleiki, og her kann skjótt talan gerast um, at millióna virðir fara fyri skeyti, sigur formaðurin í Felagnum Línuskip.

Lesið eisini her - https://www.in.fo/news-detail/pison-hevur-landad-i-anunum