Tað gongur við tann spentar ál hjá 07 Vestsur. Vágaliðið, sum umframt úr Vágum hevur manning úr eitt nú Kvívík og Vestmanna, hevur ikki tapt í ellivu teimum fyrstu umførunum. Úrtøkan er níggju sigrar og tveir javnleikir.
Í dag var tað toppur ímóti botni á Argjum. Tað endaði við 5-1 07 Vestur sigri eftir 2-0 í fyrra hálvleiki. Harvið hevur 07 Vestur tríggjar tær síðstu ferðirnar vunnið fulla úrtøku við samlaða málmuninum 21-8!
Danski álopsspælarin Søren Nielsen var tvífaldur málskjútti. Harvið er hann toppskjútti í deildini við tíggju málum. Argjamenn vóru so galantir at gera eitt sjálvmál. Hini málini skoraðu Holgar Durhuus og Tóki á Lofti, sum sambært 07 Vestur heimasíðuni var besti maður á vølli. Myndin av honum er av heimasíðuni hjá toppliðnum.
Einsamalla AB málið skoraði Hørður Tórsson.
07 Vestur er topplið við 29 stigum, og AB er aftast við fimm stigum.
mynd: www.07vestur.fo
