Jógvan Ravnsfjall
næstformaður í Norðoya Tjóðveldisfelag
Eg rokni við, at fleiri føroyingar eru ógvuliga spyrjandi um hvat veruliga er hent, og hvussu hetta kundi henda.
Eru Føroyar eitt búgvið demokrati, tá eitt so týðandi mál fyri okkara stýrisskipan ikki kann fáa eina virðiligari viðgerð enn hana, tað hevur fingið í løgtinginum?
Kristian Magnussen, løgtingsmaður, saknaði í tinginum í dag eisini viðgerðina hjá teimum stóru føroysku bløðunum av málinum um at gera Føroyar til eitt valdømi.
Eg vil geva honum rætt.
Av bløðunum er tað bert Norðlýsið, sum hevur roynt at lýst málið við at almannagera meiningarnar hjá politikarum, serfrøðingum og øðrum, og á tann hátt roynt at prógva vandan við einum valdømi. Tey stóru bløðini, Sosialurin og Dimmalætting, hava undir politisku viðgerðini verið ógvuliga tigandi í hesum málinum, hava valt at viðgjørt tað sum minst. Kanska tí tey heilhjartað hava verið fyri einum valdømi, meðan Norðlýsið hinvegin heilhjartað hevur verið ímóti.
Um tey so undir viðgerðini heilhjartað hava verið fyri einum valdømi, so kundu tey tó verið við at upplýst og kunnað føroyingar um fyrimunir og vansar við broytingini, og eisini roynt at útgreina tað polittiska spælið, ið er farið fram síðani málið tók seg upp. Men tey hava heldur valt at vísa líkasælu í hesum málinum, kanska fyri á tann hátt at órógva málið sum minst, so uppskotið um at gera Føroyar til eitt valdømi kundi verða skundað ígjøgnum sum skjótast.
So kann man vera fyri ella ímóti einum valdømi, men søgan kemur einaferð at fella dóm yvir viðgerðina av hesum máli, og rokni eg við, at tann dómurin verður til lítlan heiður fyri okkara løgting eins og partar av okkara fjølmiðlum, og harvið okkara demokrati.
