Cavling-virðislønin er størsta viðurkenning, latin verður í Danmark fyri journalistisk avrik.
Erik Eisenberg, Søren Funch og Jens Christian Hansen hava fingið virðislønina fyri avdúkandi og kritiskar greinar um Den Danske Bank.
Serliga Hafnia-málið
Dómsnevndin sigur í grundgeving sínari, at teir tríggir hava fyrst og fremst fingið virðislønina fyri sínar avdúkingar í Hafnia-málinum. Eitt mál, har teir við innanhýsis skjølum kundu prógva, at Den Danske Bank lumpaði fólk, tá hann bjóðaði út partabrøv í Hafnia - beint áðrenn konsernin fór á húsagang.
Journalistarnir hava arbeitt við Hafnia-málinum líka síðani februar 1996. Tað eru reist endurgjaldskrøv móti Den Danske Bank fyri meiri enn eina milliard krónur málinum.
Kendur í Føroyum
Teir tríggir journalistarnir hava í fleiri ár verið kendir fyri sín kritiska journalistikk, har teir hava broytt vanligu fatanina av mongum av risunum í donskum vinnulívi.
Ein teirra, Erik Eisenberg, man eisini vera væl kendur í Føroyum. Líka síðani miðskeiðis í 90-unum fylgdi hann sum journalistur á Jyllands-Postinum trúliga føroyska bankamálinum, og hann er pápi at mongum av teimum størstu avdúkingunum í hesum máli.
Myndatekstur:
Sum journalistur á Jyllands-Postinum var Erik Eisenberg pápi at mongum av teimum størstu avdúkingunum í bankamálinum. Nú hevur hann sjálvur triði fingið donsku Cavling-virðislønina - fyrst og fremst fyri Hafnia-málið.
