Tað sigur Regin W. Dalsgaard, nevndarformaður í Thetis, í stórari samrøðu um Thetis, sum er í vikuskiftis-Sosialinum, sum hevur viðgjørt sera góða ársúrslitið hjá Thetis, og sera góðu samsýningar, sum leiðsla og eigarar felagsins hava fingið burturúr.
Regin Dalsgaard sigur, at koronukanningarnar kundu verið gjørt fyri ein lægri prís, enn tað verður gjørt í dag.
Hann vísir á, at set-up'ið við kanningum í Føroyum er sera gott, og at Thetis saman við Heilsufrøðiligu Starvsstovuni høvdu kunnað klárað 10.000 kanningar um dagin.
– Og høvdu vit opið alt samdøgrið, so kundu allir føroyingar komið til kanningar, tá tað passaði teimum, um tað so var mitt um náttina. Tað hevið kostað minni, enn tað kostar nú, tí so sluppu vit undan at hava hetta set-up’ið við dupultari manning, skanning og alt hatta har við so nógvum fólkum. So hevði tað verið ein fastur prísur fyri bæði poting og kanning, sigur hann.
Og Thetis kundi tá brúkt síni egnu høli við Hoyvíksvegin til potingina í Havn eisini umframt onnur kanningarstøð kring landið.
– Næsta stigið hjá Thetis er at bjóða vinnuni, at vit fara at koyra út til fyritøkur ókeypi at kanna, og so gjalda fyritøkurnar fyri kanningina. Vinnan hevur tikið sera væl ímóti hesum – tey ynskja at tryggja sær, at eingin hevur koronu í samband við jólaborðhald og onnur felags tiltøk, sigur Regin W. Dalsgaard.
