Gjáramorgunin hendi eitt ferðsluóhapp á Sandavágshálsi í Vágum. Hetta var eitt sonevnt soloóhapp, har ein bilur fór út av vegnum og er endaði á takinum í einari veit.
- Vit vita ikki so nógv um ferðsluóhappið beint í løtuni, men tað tykist eitt sindur ógvusligt, segði vaktleiðarin á løgreglustøðini stutt eftir fráboðanina gjáramorgunin.
Lagt varð aftrat, at helst fær løgreglan meira at vita um óhappið seinni.
Løgregla, sjúkrabilur og sløkkilið vóru á staðnum, og sagt varð, at neyðugt var at taka eina hurð av bilinum fyri at fáa føraran út.
Á løgreglustøðini søgdu tey seg ikki vita, hvør orsøkin var til óhappið - um tað møguliga kundi vera vindur ella hálka, sum vóru viðvirkandi til hendingina.
Í morgun visti vaktleiðarin ikki nógv meira enn tað sama at siga um ferðsluóhappið á Sandavágshálsi, men so skjótt tað ber til, verður bilførarin avhoyrdur.
- Vit vita ikki neyvt, hvør støðan hjá bilføraranum er, men vit hava tíbetur ta ábending, at viðkomandi ikki fekk álvarsligan skaða í ferðsluóhappinum.
Vaktleiðarin segði í morgun, at bilførarin verður avhoyrdur, tá tað ber til, og væntandi fæst tá greiða á, hví tað gekst so galið á Sandavágshálsi gjáramorgunin.
