Cristiano Ronaldo er í stórform, og tykist av álvara at verða klárur at møta gomlu liðfeløgunum úr Manchester United í Champions League mikukvøldið.
Real Madrid vann í gjár 4-1 á Sevilla á Santiago Bernabeu í Madrid. Høvðusorsøkin til sigurin var portugisin við sjey talinum á rygginum. Tað var annars Karim Benzema, sum legði Real Madrid á odda, tá hann á sjálvari málstrikuni fekk fatur á bóltinum, og so var lætt at prika hann í málið.
Tá dysturin var 26 minuttir gamal økti Cristiano Ronaldo við frálíkum máli. Nakað úti í høgru síðu snýtir hann hegnisliga mótstøðu mannin og leggur bóltin til vinstra beini. Úr yvir 20 metrum meddar hann bóltin í handaa síðunet til 2-0.
Bara ein minutt inn í seinna hálvleik var portugisin aftur upp á spæl. Hann fekk fatur á bóltinum miðskeiðis á hálvuni hjá Sevilla og rann frá verjuni, áðrenn hann trygt setti bóltin í netið.
Eitt lítið korter inn í seinna hálvleik skoraði Cristiano Ronaldo sítt triðja við eini sannari skjótálopsperlu. Kviki vongurin fekk bóltin langt inni á egnari hálvu og setti ferð á. Ongin megnaði at fylgja honum. Komin áraka brotsteigarmarkið leggur hann bóltin út í høgru til Gonzalo Higuaín, sum leggur bóltin innfyri har Cristiano Ronaldo er fyrstur á og skorar.
Gonzalo Higuaín fekk løtu seinni sítt seinna gula kort, men tað hevði ikki nakara ávirkan á dystin sum so. Sevilla minkaði um munin, men megnaði ongantíð at hótta leiðsluna hjá Real Madrid.
Mikukvøldið tekur Real Madrid móti Manchester United í Champions League. Cristiano Ronaldo bleiv heimsins dýrasti fótbóltsspælari, tá hann skifti frá júst Manchester United til Real Madrid í 2009 fyri áleið 800 milliónir krónur.
Real Madrid hevur framvegis langt upp til Barcelona í heimligu kappingini. Barcelona spælir longu klokkan 11 í dag móti Getafe.
