Aftur í ár fer Bátafelagið á Toftum at skipa fyri árliga bátafestivalinum, sum hvørt ár síðan 2005 hevur verið hildin fyrsta leygardag í mai. Hetta verður sostatt hin tíggjundi bátafestivalurin á Toftum.
Sum vanligt hevur verið undanfarin ár, savnast bátarnir í Skálafirði um middagsleitið henda dagin, og síðan stevnir fylgið út eftir Skálafjørðinum og út á Toftir, har bátarnir koma klokkan 14.
- Í ár verður tó skipað soleiðis fyri, at bátarnir kunnu liggja nátt í Søldarfirði, og í tí sambandi verður hugnaløta í Søldarfirði fríggjakvøldið 2. mai.
Á Toftum siga tey, at tá komið er út móti Oyrunum leygardagin, og bátarnir eftir neyvari skipan stevna inn í Oyrahavnina og leggja til bryggju, setir Harmonikuliðið sín dám á við at spæla sjómanssangir.
- Tá so allir bátarnir eru komnir trygt í havn, verður borðreitt við suppu. Ymiskt verður til undirhalds á stevnuøkinum, sum seinnaparturin og kvøldið ganga, bæði fyri børnum og vaksnum.
Lagt verður aftrat, at tá kvøldið kemur, verður stórur dansur í tjaldinum við Halli Joensen Band.
Sum nakað nýtt, verður í ár skipað fyri ymiskum tiltøkum í Nes kommunu í vikuni upp undir bátafestivalin.
- Talan verður um ymisk mentanarlig tiltøk, fyrilestrar og annað.
Tað verður Nes kommuna, sum saman við frítíðarfelagsskapum í kommununi, ið skipa fyri hesum partinum av tiltøkunum.
