Fótbóltur
Nakrar vikur eftir kappingarlok er nú gjørt av, at tað verður MB og ikki AB, sum saman við Fram flytur upp úr 2. í 1. deild.
AB hevur havt hendan sessin, eftir at felagið í fyrsta umfari vann kærumál móti Skála, sum teir mettu hava nýtt ikki-lógligan spælara.
Skála kærdi tó málið, og vísti millum annað á, at eisini AB spældi við ikki-skrásettum spælara.
Yvirkærunevndin hevur nú viðgjørt málið, og har er niðurstøðan, at tá bæði feløgini hava nýtt ikki-skrásettan spælara, skal hvørgin parturin hava stig fyri dystin, sum annars endaði 2-2 á vøllinum.
Tað ber við sær, at AB missur stigini, sum teir annars høvdu vunnið í úrskurðinum frá Aganevndini, og tí verður tað nú MB, sum flytur upp í 1. deild.
Endaliga støðan í 2. deild er sostatt, at Fram vinnur deildina við 45 stigum. MB er nummar tvey við 29 stigum, og AB er altso nummar trý við 28 stigum.
