Tað er ikki so sjáldan, at tú hoyrir, at útlendingar einki rinda fyri at koyra ígjøgnum undirstjóvartunlarnar í Føroyum.
Vit hava spurt Una Danielsen, stjóra í tunnil.fo, um tað er so, ella um talan er um ein »mytu«.
– Nei, tað passar ikki, og ja, hatta er ein seiglívað myta. Allir bilar rinda fyri at koyra ígjøgnum undirsjóvartunlarnar, sigur stjórin í tunnil.fo, sum er felagið, sum krevur gjaldið inn fyri øll trý tunnilsfeløgini.
Hann vísir á, at til fyri einum tveimum, trimum árum síðani var tað soleiðis, at útlendskir bilar skuldu inn á bensinstøðir at gjalda. Tað var í so nógv arbeiði av hesum, og tí hava tey gjørt eina nýggja skipan, har útlendsk ferðafólk kunnu fara inn á heimasíðuna, har tey kunnu rinda fyri hvønn túr, men enn betur, har tey kunnu lesa sítt gjaldkort inn soleiðis, at tað verður goldið tunnilsgjald so hvøt tey koyra ígjøgnum tunlarnar, eins og hjá teimum, sum hava hald. Men talan er ikki um hald, men um gjald fyri stakar túrar, sum er dýrari, og tí rinda útlendskir bilar meira enn føroyskir bilar fyri at brúka undirstjóvartunlarnar.
Men hvat so, um útlendingar láta sum einki og koyra uttan at gjalda?
– Nei, tað gongur heldur ikki. Tí vit kunnu krevja pengarnar inn, eftir at tey eru farin, sigur Uni Danielsen.
Hann sigur, at tunnil.fo brúka eitt felag í London, sum krevur slík gjøld inn, og sum hevur atgongd til allar nummarplátur í Evropa, so tað loysir seg ikki at koma hartil, tí tá verður tað ein dýrari søga við eykagjaldi oman á gjaldið, sum tunnilsfelagið skal hava.
Vit hava hoyrt um føroyingar, sum búgva uttanlands, og sum eru komin til Føroya við útlendskum bili, sum er komin illa fyri, tí tey hava hildið, at tey kundu koyra ókeypis.
– Ja, slíkar søgur hava vit eisini hoyrt, at fólk í slíkum førum hava valt útlendska bilin, »tí hann rindar ikki tunnilsgjald«, og so hevur viðkomandi fingið eina stóra rokning sendandi, sigur Uni Danielsen.
Hann sigur annars, at trupulleikin við útlendskum bilum, sum ikki rinda – og tí verður kravdir eftir pengum gjøgnum hetta felagið í London, ikki er stórur.
– Tað eru millu 75 og 80 prosent av øllum útlendskum bilum, sum rinda tunnilsgjald, sum tey eiga, sigur Uni Danielsen. Og tað heldur hann vera heilt gott, tí samanborið við í Noreg, so liggur tað ikki hægri enn á 10-15 prosent, sum rinda tunnilsgjøld, sum tey eiga.
Hví so stórur munur er á, veit Uni Danielsen ikki, men hann hugsar, ein orsøk kann vera, at í Føroyum er bara ein vegur av landinum, og tað er við Norrønu. So um tunnilsfelagið vildi, so kundu tey havt fólk á bryggjuni ella umborð á Norrønu at krevja pengar inn.
Stjórin í tunnil.fo leggur afturat, at tey gera eitt stórt arbeiði at kunna útlendsk ferðafólk við bili um, hvussu reglurnar eru viðvíkjandi gjaldi og koyring í undirsjóvartunlunum, og tað hevur givið ávøkst, heldur hann.