Myndin oman fyri vísir staðið, rópt Reinebringen í Lofoten, har ein amerikanskur ferðamaður í dag datt út av og læt lív í fallinum.
Í kvøld sigur løgreglan í Nordland á Twitter, at tey avvarðandi hjá manninum, sum er í 20-unum, hava fingið boðini um vanlukkuna.
Løgreglan fekk boðini í dag klokkan 14.40, og átaksleiðarin í Lofoten, Kai Eriksen, sigur við tv2.no, at ein Sea King tyrla var við í royndini at bjarga manninum.
Ungi maðurin, sum datt út av Reinebringen í Lofoten, var saman við einari kvinnu, hann er skyldur við.
- Hon er týðiliga merkt av hendingini. Løgreglan hevur sett í verk kreppuhjálp til tey, sum vóru nærindis, og tað vóru fleiri, sum sóu ferðamannin detta.
Sambært tv2.no hevur løgreglan sett í verk eina kanning, men løgreglan er sannførd um, at talan var um eina syrgiliga vanlukku.
- Reinebringen, sum er 448 metrar høg, telist millum mest eftirspurdu støð í Noregi hjá ferðafólki, sum leita sær niðan í fjøllini.
Lagt verður aftrat, at ungi amerikanski ferðamaðurin, sum var og vitjaði saman við øðrum, er ikki hin fyrsti, sum hevur latið lív her.