Formenninir í teimum trimu andstøðuflokkunum skriva soleiðis í lesarabrøvið, har teir heita á løgmann um at kalla andstøðuflokkarnar til fundar um avgerðina um russlandssáttmálan:
»Løgmaður hevur boðað frá, at avgerð verður tikin í vikuni, um farið verður undir samráðingar við Russland um nýggja fiskiveiðuavtalu fyri komandi ár.
Landsstýrið hevur ikki tikið andstøðuna við uppá ráð.
Avgerðin hevur stóran týdning fyri okkara land. Stór virðir standa uppá spæl, og tí er tað neyðugt, at landsstýrið tekur andstøðuna við í viðgerðina, soleiðis at avgerðin byggir á so breitt politiskt grundarlag sum gjørligt.
Vandi er fyri, at tað lítil meiriluti í samgonguni tekur avgerðina, og er tað ikki til gagns fyri málið.
Spurningurin um framhaldandi fiskiveiðuavtalu við Russland er størri enn samgonga móti andstøðu. Tí er týdningarmikið, at allir flokkar verða kallaðir inn at umrøða og viðgera spurningin.
Ikki fyrrenn tá kunnu møguleikar fyri breiðari semju troytast. Nógv hevur verið tosað um breiðar semjur, men nú hevur samgongan møguleika fyri at vísa tað í verki.
Okkara áheitan til samgonguna skal tí vera, at andstøðan verður kalla inn, nú avgerðin skal takast.
Vit eru til reiðar at koma til borðið.
Bárður á Steig Nielsen, vegna Sambandsflokkin
Beinir Johannesen, vegna Fólkaflokkin
Jenis av Rana, vegna Miðflokkin«
Við útvarpið í kvøld segði Aksel V. Johannesen, løgmaður, at hann fer at senda boð eftir andstøðuni. Men fyrst verður avgerðin viðgjørd í samgonguni.
Tað verður í síðsta enda uttanlandsnevndin hjá Løgtinginum, sum skal ráðgeva landsstýrismanninum í fiskivinnumálum, Dennisi Holm, um avgerðina.
