Annika Olsen møtt ringast upp í tinginum

Av tí at hon ikki hevur havt varafólk fyri seg á tingi, meðan hon hevur verið burturstødd í privatum ørindum á jólum, varð hon skrivað sum fráverandi fyri 10 tingfundir síðani 22. desember.

Tí vann Annika Olsen "kappingina" ímóti Jákup Mikkelsen, Jenisi av Rana og Magna Laksafoss, sum hava verið burturstaddir í ávikavist 9, 9 og 8 tingfundir – um at verða tað tingfólkið, sum sambært gerðabók løgtingsins hevur møtt ringast upp til løgtingsfundir hesa tingsetuna.

Til allar atkvøðugreiðslurnar í tinginum, sum hava verið í øllum rokinum á teimum 10 tingfundunum, sum hava verið síðani 22. desember, hava 31 av teimum 33 tingfólkum atkvøtt. Og tað hava tey gjørt, hóast 32 tingfólk hava verið á tingfundi.

Orsøkin til tað er, at tingfólk hava ta avtalu, at tey kunnu "cleara" hvønn annan, um onkur er burturstaddur. Er til dømis ein samgongutinglimur burturstaddur, so verður avtalað við ein andstøðutinglim, at hann ikki atkvøður – og øvugt. Soleiðis hevur eisini verið gjørt nú á jólum. Annika Olsen, uttanflokkatingkvinna, hevur verið burturstødd, og tí hevur Sonja Jógvansdóttir, uttanflokkatingkvinna, ikki atkvøtt.

Nú vit eru komin til ársins síðsta dag, so verða hagtøl uppgjørd. Løgtingið hevur eisini hagtøl, millum annað um, hvussu tingfólk hava møtt upp til tingfundir. Hesa tingsetuna – tingsetan 2015, sum byrjaði á ólavsøku – hevur løgtingið havt 47 tingfundir. Yvirlitið – sum er úr gerðabókini hjá Løgtinginum – vísir, hvussu tingfólk hava møtt til hesar tingfundir. Fimm av tingfundunum vóru fyri løgtingsvalið. Tey nýggju tinfólkini og landsstýrisfólkini úr undanfarni samgongu, hava tí bert kunna møtt á 42 av hesum 47 tingfundum. Tí verður teirra fráveruprosent roknað út frá 42 tingfundum.

Gerðabók verður førd eftir hvønn løgtingsfund, og tá verður viðmerkt, hvørji tingfólk ikki møttu á fundi uttan at hava fingið farloyvi frá løgtinginum frammanundan.