Avstralska stjórnin hevur sett seg í samband við amerikansku stjórnina um eina hending, har ein avstralskur journalistur varð raktur av eini gummikúlu í Los Angeles.
Tað sigur Anthony Albanese, forsætisráðharri, við Reuters.
- Vit hava reist hesar spurningar við amerikansku umsitingina. Vit halda tað ikki kunna góðtakast, at hetta hendi, segði hann við tíðindafólk.
Hann lýsti eisini myndirnar frá staðnum sum "ógvusligar".
Talan er um tíðindafólkið hjá 9News, Lauren Tomasi, sum varð rakt av eini gummikúlu í Los Angeles sunnudagin, meðan hon lýsti mótmælisgongu móti tilflytarapolitikkinum hjá amerikanska forsetanum, Donald Trump.
Hendingin varð tikin upp á myndatóli og hevur verið deild á sosialu miðlunum eins væl og í siðbundnum miðlum.
Í videobrotinum sæst Tomasi á einum vegi, har løgreglan í Los Angeles, LAPD, sæst í bakgrundini bæði á hestbaki og til gongu. Fleiri fólk síggjast eisini á gøtuni. Áðrenn hon verður skotin, sigur Tomasi við myndatólið:
- Eftir fleiri tímar við konfrontatiónum er støðan nú skjótt versnað, og LAPD er komið á hestbaki, skotið gummiskot móti mótmælisfólkunum og reka tey gjøgnum hjartað í Los Angeles.
Hon rópar stutt, og so verður myndatólið tikið frá henni. Ein persónur rópar, at "tú skeyt bara journalistin". Tomasi sigur tá sjálv, at hon hevur tað "fínt".
Sum úrslit av hendingini sendi uttanríkis- og handilsmálaráðið í Avstralia út eina fráboðan, har sagt varð, at "allir journalistar skulu kunna gera sítt arbeiði trygt".
- Avstralia stuðlar fjølmiðlafrælsi og verju av journalistum, sambært The Guardian.
Tomasi hevur viðmerkt málið á sosiala miðlinum X.
- Eg eri eitt sindur eym, men eg havi tað gott. Tað er umráðandi, at vit framhaldandi siga tær søgurnar, sum skulu sigast, sigur hon sambært Reuters.
Tað er ikki greitt, um USA hevur svarað áheitanini frá avstralsku stjórnini.
Danski fríyrkisjournalisturin, Sara Gerlach Madsen, varð eisini rakt av gummikúlu, meðan hon lýsti ófriðin í Los Angeles. Gerlach Madsen varð rakt í pannuna, sigur hon við TV 2.
- Tað virkaði sum um tey bara vóru skotin av tilvild. Eingin avgerð varð tikin um, hvør var hvør og hvør hevði eitt stórt pressuskelti á bakinum, segði hon við miðilin í gjár.
Hon fekk ikki skaða, men var "ógvuliga bangin", segði hon.
/Ritzau/
