Tað verður um 14-tíðina í dag, at bátar loysa í Vestmanna og sigla yvir undir Vágalandið. Felags bátasiglingin byrjar undir Fútakletti klokkan 14.30.
Tá bátarnir hava lagt trygt til bryggju, verður bjóðað til ókeypis suppu í stóra tjaldinum, og her eru allir bátastevnugestir hjartaliga vælkomnir.
Løtan, tá bátarnir leggja til bryggju, og fólk í stórum tali leita sær í tjaldið til suppu, er altíð hugnalig, og í supputjaldinum verða eisini harmonikutónar at hoyra, meðan suppan verður sopin.
Klokkan 16 verður bjargingarroynd á vágni, og klokkan 16.30 verða ódnartøk, sum hesin kappróðurin verður róptur.
Norrøna Dansiband fara at spæla í “hólminum” í tímunum millum klokkan 18 og 20, og tá fer alifyritøkan Luna eisini at bjóða ókeypis laksamáltíðir.
Í kvøld klokkan 19.45 fara vestmenningar at vísa Champions League-finaluna á stórskíggja í tjaldinum. Klokkan 21.30 fer Eyðun Nolsøe á pall, og ein tíma seinni fara Shamrock at framføra írskan fólkatónleik.
Stórdansurin byrjar á midnátt, tá FourMEN og Signar í Homrum fara á pall í stóra tjaldinum, og í lítla tjaldi fara Danny & The Veetos og Finnur Koba á pall klokkan 01.
