Filminstituttets festivaludvalg hevur gjørt av, at stilla filmin um Barbu og harra Pál hjá Nils Malmros inn til ein Oscar.
Við donsku innstillingini eru Barba við í kappingini um at gerast ein av teimum fimm útlendsku filmunum, sum verða innstillaðir í bólkinum »Besti útlendski filmur«.
Danska innstillingin varð almannakunngjørd í gjár, men avgerðin var í veruleikanum tikin á fundi hjá festivalnevndini í síðstu viku. Í nevndini sita umboð fyri danska filmsídnaðin og tey hava valt út Oscar-kandidatin millum allar aðrar danskar spælifilmir, sum hava havt frumframførslu síðan 1. november í fjør fram til 31. oktober í ár.
Tann danski filmurin, sum seinast kundi komið upp á tal hesaferð, er familjufilmurin »Sunes familie«, sum varð frumframførdur í gjár. Eingin heldur kortini, at hesin filmur er ein Oscar kandidatur, men fyri at rætt skal vera rætt skal hann kortini telja við í teimum filmunum, valt verður ímillum. Tí kemur almenn fráboðanin í dag.
Umleið 40 filmir uttan fyri USA - herímillum Barba og harra Pál - verður í komandi tíðini mettir av altjóða samansettu nevndini, forign Film Commetee undir amerikanska filmsakademinum, sum letur Oscarheiðurslønirnar. Nevndin fer ikki fyrr enn í februar at vísa á teir fimm innstillaðu útlendsku filmarnar, sum eru við í »endaspælinum« til Oscar-virðislønarhandanina í Los Angeles í mars mánaði komandi ár.
Danmark hevur tvær ferðir fyrr vunnið heiðurin sum »Besti útlendski filmurin«. Tað var í 1988 við »Babettes gæstebud« og í 1989 við »Pelle Erobreren«. árið eftir - í 1991, var »Dansen med Regitze« innstillaður, men vann kortini ikki.
