Er tín bilur bensin, diesel, el ella annað?
- Øll míni akfør eru bensin. Eg meti, at bensin roynist best, tá alt kemur til alt. Tá hugsi eg eisini um viðlíkahald av akfari og prísir á billutum.
Tað sigur Poul Fannar Mittelstein, sum býr í Skopun og er bilmekanikari.
Hvørjar royndir hevur tú av bilinum?
- Eg havi bara góðar royndir, tí eg velji at keypa bilar, sum eg veit eru driftsikrir – bilar, sum fáa meg frá A til B og sum starta hvørjaferð.
Hugsar tú um el-bil til næsta keyp?
- Avgjørt ikki. Tað størsta battaríið, eg keypi, situr í telefonini, sum eg brúki beint nú. Skal tað ganga vilt – ja, so er tað battaríið í einari skrúvumaskinu.
Poul Fannar sigur, at hansara val er ikki at stuðla propaganda, sum hann tekur til.
- Tískil fari eg ongantíð at keypa ein el-bil so leingi, hann ikki er tað, hann er lýstur sum, nevniliga sum grønur.
At enda sigur Poul Fannar Mittelstein, at konseptið við el-bilum er fínt, men hann heldur, at ein el-bilur skal gera meira enn at fylla lummarnar hjá nøkrum fáum, sum hann tekur til.
(Í seinasta VikuskiftisSosiali høvdu vit serblað um bilar)
