Bill Jacobsen, venjari hjá AB, harmast um, at dysturin millum AB og B36 ikki verður spældur í kvøld. Nú ein hálvan tíma eftir, at fyrsta bríkslið var ásett at vera, er tað púra stilt í Vika á Argjum.
-Tað eru nógvir dystir spældir í Føroyum í verri líkindum enn teimum, sum nú eru her á vøllinum. Her er púra stilt nú, staðfestir ein harmur AB venjari, sum kortini tekur til eftirtektar, at dómarin hevur útsett fyrsta bríkslið at vera klokkan 13 í morgin. Nú fer hann av avtala við sínar menn, hvussu farast skal fram fyrrapartin í morgin.
Eisini B36 venjarin Sámal Erik Hentze harmast um, at tað var mett neyðugt at útseta:
-Vit mugu taka tað til eftirtektar, sum dómarin ger av. Men eg eri samdur við AB venjaran í, at nú verður neyðugt at leggja ætlanir fyri, hvussu farast skal fram í morgin, sigur Sámal Erik Hentze í samrøðu við Rás2.
Rás2 fer at siga frá AB-B36 klokkan 13.00 í morgin.
Seinni í kvøld verður samrøða við Petur Reinert, dómara, her á síðuni. Tað var hann, sum gjørdi av, at tað ikki var ráðiligt at spæla á Argjum í kvøld.
