Bill steðgaði Skála

Inntil á ólavsøku í fjør var Bill Jacobsen venjari á Skála. Tá samdust hann og felagið um, at tað var best, at teirra vegir skiltust, og at nýggjur maður fekk ábyrgdina.

Í kvøld hittust Bill og Skála aftur. Nú er Bill Jacobsen ungdómsmennari í Runavík og venjari hjá næstbesta NSÍ liðnum.

Tá ið dómarin bríkslaði fyri síðstu ferð, vísti talvan 2-1. Tað gekk altso ikki hjá Sorin Anghel og hansara skálamonnum at vinna fulla úrtøku í fyrsta triðinginum av ársins landskapping.

Talan var um javna grannauppgerð, og skálamenn vóru meiri á bóltinum. Men tá ið teir í seinna hálvleiki royndu at spenna álopsbogan fyri at vinna úrtøku, so megnaðu teir ikki at vinna seg í heilt góða støðu.

Miðskeiðis í fyrra hálvleiki legði Beinir Nolsøe heimaliðið á odda 1-0. 17 ára gamli Beinir Nolsøe hevur verið við í øllum dystunum í næstbestu deildini í ár, og í kvøld skoraði hann fyrsta málið í 1. deild í ár. Í fjør skoraði hann eitt mál.

Tveir minuttir seinni javnaði miðverjin Kristian Martin Jakobsen eftir deyðbólt, sum Poul Kallsberg tók sær av.

Fýra minuttir eftir steðgin skoraði Aron Knudsen 2-1 sigursmálið. Hann spældi í 67 minuttir, áðrenn hann varð skiftur út. Fyrr í dag spældi hann 35 minuttir, tá ið tað í bestu deildini endaði 1-1 millum NSÍ og 07 Vestur.

Mórits Heini Mortensen var allan dystin á vøllinum í 2-1 sigrinum ímóti Skála. Hann var fyrr í dag á besta liðnum í 10 minuttir. At NSÍ liðið í kvøld var væl mannað sást við at eisini Pætur Hentze spældi allan dystin, og at Pætur Turiðarson Skipanes var á vøllinum í 67 minuttir. Fyrr í dag var hann á besta liðnum í 35 minuttir.

Skála er topplið við 21 stigum fyri 8 dystir, og NSÍ er á øðrum plássi við 17 stigum fyri 9 dystir.

Hósdagin fær NSÍ vitjan av B71, og Skála fær vitjan av FC Suðuroy.

KÍ - AB 0-0

Víkingur - B36 5-1 (3-0)

1-0: Sveinur Justinussen 10.

2-0: Sveinur Justinussen 33.

3-0: Martin Klein Joensen 40.

4-0: Páll Eirik Djurhuus 53.

4-1: Gilli Samuelsen 81.

5-1: Rani Hansen 85.

NSÍ - Skála 2-1 (1-1)

1-0: Beinir Nolsøe 23.

1-1: Kristian Martin Jakobsen 25.

2-1: Aron Knudsen 49.

B71 - HB 1-3 (1-1)

0-1: Símun Samuelsen 20.

1-1: Clayton Soares 28.

1-2: Sjálvmál 62.

1-3: Rani Sørensen 88.

FC Suðuroy - EB/Streymur 2-1 (1-0)

1-0: Dennis Rasmussen Nielsen 26.

1-1: Magnus Jarnskor 69.

2-1: Reidar Dahl Joensen 82.