Birita átti einasta føroyska gullið

Føroyar vunnu seks heiðurs­merki í NJM og NM kappingunum, sum hetta vikuskiftið vóru í Gunda­dali. Bestu úrslitini av føroysku svimjarunum rakk Birita Debes úr Ægir. Hon vann einastu gull­krón­una til Føroya, tá ið hon við fínum avriki sigraði í 100 metra kappingini í rygg­svimjing, og hon vann silvur í 50 metra kappingini í rygg­svimjing.
Hóast avrikini hjá Biritu vóru góð, so megnaði hon ikki at seta nýggj met. Hon eigur sjálv metið. Tað verður vónað, at hon í EM kappingini á stuttgeil, sum verður í Herning seinni í hesi vikuni, fer at betra um sítt egna met.
Óli Mortensen úr Havnar Svimjifelag vann bronsu í 1500 metra frí­svimjing­ini. Hann hevði vónað at rokk­ið silvurplássið, men tað eydnaðist ikki.
Hini trý heiðursmerkini vórðu vunnin í kappingum, har tað ikki bar til at sleppa undan hjá Føroyum at vinna heiðursmerki, um tað eydnaðist at svimja tein­in lógliga. Talan var um tvey heiðursmerki í lið­kapp­ingum og um bronsu­krónuna, sum Turið S. Christiansen vann í 200 metra bringusvimjing.
Føroyar høvdu møgu­leika at vinna eitt bronsu­merki aftrat. At tað ikki eydn­að­ist komst av, at før­oyska liðið varð koll­dømt í kappingini 4 x 100 m blandað fyri kvinnur. Svøríki vann gull og Dan­mark silvur. Tað lut­tóku bara trý lið í hesi kapp­ing­ini. Føroyska liðið varð kolldømt orsaka av óreglu­ligum starti.

Óførur norðmaður
Noreg stóð seg væl í kapp­ingini. Millum tey, sum vóru í Svimjihøllini í Gundadali, varð serliga lagt til merkis Henrik Christiansen. Longu fríggjakvøldið vann hann 1500 metra kapp­ing­ina í frísvimjing. Tíðin hjá honum var 14:56.99. Næstur honum var Ole Martin Bjørlykke, sum eisini er úr Noregi. Tíðin hjá honum var 15:19.31.
Henrik Christiansen er føddur í 1996 og harvið 17 ára gamal. Tíðin hjá hon­um í 1500 metra kapp­ing­ini var so mikið góð, at hann bara er átjan sekund aftan­fyri sættu bestu til­meldingartíðina til EM kapp­ingina, sum í hesi vik­uni verður í Herning í Dan­mark.
Tað er einki at ivast í, at tað næstu árini verður nógv meiri at hoyra um Henrik Christiansen úr Noregi. Umframt at vinna gull á 1500 metrum frí, so vann hann gull í 400 metr­um blandað, gull á 400 metrum frí, gull í lið­kapp­ing 4 x 200 metrum frísvimjing og silvur í 200 metra frí.