- Brøndby Stadion
Brádliga fara fleiri fólk at hosta og taka sær til eyguni. Onkur er um at spýggja, meðan onnur turka sær um munnin og royna at spýta ólekra smakkin út. Tað er ikki til at síggja, men táragass hevur ein sterkan virkning. Eisini nøsin fær ein umgang.
Tað er ein lítil løta síðani, at FCK fjeppararnir gingu eftir sama vegi. Løgreglan hevur brúkt táragass fyri at fáa teir at halda fram. Frammanundan hevur verið áfat millum Brøndby og FCK viðhaldsfólk, sum hava tveitt ymiskt eftir hvørjum øðrum. Onkrar søgur siga, at tað eisini hevur verið nevaleikur upp í, men tað er vónleyst at trúgva øllum, sum tú hoyrir beint aftaná ein dyst.
Táragassið er ein staðfesting av, at talan hevur verið um álvarsligar hendingar, eftir at dysturin á Brøndby Stadium er liðugur.
Longur frammi standa ein røð av løgreglubilum, sum blinka. Løgreglufólk í alskins verju eru í hópatali. Óviðkomandi fáa boð um at halda seg vekk, og tað verður ikki spurt pent tvær ferðir. »Pilla av« er boðini aðruferð við einum skumpi í rygginum.
Framvið vegnum sita fleiri hundrað FCK viðhaldsfólk, sum eru handtikin. Ongin sleppur nær við tey. Onkir løgreglufólk eru meira diplomatisk og greiða forvitnu fólkunum frá hvat er á vási. FCK viðhaldsfólkini hava ikki klára at hildið seg til vanligan fólkaskikk, og tað verður ikki góðtikið. Buss-stegðistøð eru brotin, garðar og annað, sum kann brótast, er brotið. Múrssteinar eru brúktir at tveita við, og tað gongur millum annað útyvir skakkaðar íbúgvar á ellisheimi.
Á tokstøðini í Glostrup, sum er høvðusstatiónin fyri at sleppa inn í býin aftur, fara menn til hendurs. Tveir teirra enda á sjálvari togbreytini.
Nei, hetta er ikki bara ein uppgerð millum teir arvafíggindar á vøllinum, men so sanniliga eisini uttanfyri vøllin. Tað fingu áskoðararnir at kenna, tá teir skuldu heim av Brøndby Stadium sunnukvøldið.
Spennandi upptakt
Uppgerðirnar millum Brøndby IF og FC Keypmannahavn er doyptar »New Firm«, eftir uppgerðunum millum skotsku feløgini, Celtic og Glasgov Rangers, sum verða róptar »Old Firm«. Sunnudagin var »New Firm« dystur á Brøndby Stadium.
Bæði Brøndby og FCK hava verið í einum aldurdali í seinastuni, men eru nú í stórformi. Brøndby megnaði akkurát at bjarga sær í Superliguni farna kappingarár, meðan FCK í ár hevur verið undir niðurflytingarstrikuni.
Nú er vent í holini. Brøndby og FCK hava vunnið seg í toppin av donskum fótbólti. Tí hevði hendan uppgerðin ein dám av oddadystin yvir sær.
Løgreglan er væl fyrireikað. Serligt fótboltstok er sett inn frá Nørreport. Tað er ikki til at taka feil av hvat tok talan er um. Í teimum fremstu tokvongunum eru Brøndby viðhaldsfólk, meðan tað eru FCK viðhaldsfólk í teimum aftastu tokvongunum. Tey syngja og rópa óført.
FCK?, spyr ein løgregludama í tokinum.
Tað er ikki uttan orsøk, at einki hvítt ella gult er at hóma á klæðunum hjá undirritaða.
– Nei, hvørki FCK ella Brøndby, er svarið.
Ansa bara eftir hvat tú sigur um FCK her, er speiska aftursvarið frá løgregludamuni, sum saman við tveimum øðrum løgreglumonnum heldur skil á, at viðhaldsfólkini hjá FCK og Brøndby eru atskilt.
Tokið koyrir til Glostrup, har tað eru stutt yvir ein kilometur at ganga til leikvøllin hjá Brøndby. FCK viðhaldsfólkini eru í góðum lag, tá løgreglan fylgir teimum frá tokstatiónini til leikvøllin. Fleiri fýrverksbumbur verða tveittar garðar á vegnum til stadium.
Á Brøndby Stadium er gott lív í longu ein tíma undan dystarbyrjan.
René og lívið í Brøndby
René Shaki Joensen er einsamallur føroyingur í hópinum hjá Brøndby. Hann hevur spælt ein dyst í Superliguni, men í dag tykist langt til eitt pláss millum teir ellivu á vøllinum. Hann tó ikki mist mótið móti og møtir trúgvur upp til tey ymisku tiltøkini hjá Brøndby.
Hesa ferð skal hann skrivar autografar í Brøndby Kids økinum. Hann situr saman við fleiri av hinum spælarunum, sum ikki eru við. René ger tað við einum smíli og heilsar pent upp á børnini, sum koma yvir at fáa autograf.
– Hetta er ein partur av tí, letur úr René, meðan hann skrivar undir eina mynd av sær sjálvum. Hann hevur játtað at taka Sosialin við aftur um leiktjøldini í Brøndby.
– Kom bara við mær, sigur René og vísir vegin til VIP lounge, har fleiri av fyrrverandi spælarunum eru millum gestirnar.
Tvey kend nøvn í føroyskum fótbólti eru at síggja. Tað eru fyrrverandi og núverandi landsliðsvenjararnir hjá okkum, Henrik »Store« Larsen og Lars Olsen.
Støðan hjá René í Brøndby er ógreið í løtuni. Hann hevur sáttmála til komandi summar, men skal í næstum til samtalu við ítróttarstjóran í felagnum.
– Tað eru fleiri møguleikar. Kanska teir vilja leiga meg út, kanska teir vilja leingja, ella kanska vilja teir sleppa av við meg, sigur René.
Hann er bjartskygdur undan dystinum og vónar, at liðið hjá honum kann vinna dystin.
Brøndby uttan lyklaspælarar
Undir upphitingini sæst Mikkel Thygesen, skaddur liðskipari hjá Brøndby, standa frammanfyri viðhaldsfólkunum hjá Brøndby og undirhalda teimum. Hann er bara ein av fleiri spælarum, sum mangla hjá Brøndby til dystin. Aðrir sum kunnu nevnast er Martin Albechtsen, meðan Simon Makienok byrjar á bonkinum, tí hann er júst komin aftur frá skaða.
Stutt undan dystarbyrjan koma aftur keðilig boð. Stóra innkeypið í summar, fyrrverandi Chelsea verjuspælarin, Khalid Boulahrouz, er ongastaðni at síggja. Søgan sigur, at hann er blivin skaddur í upphitingini.
– Hann er ein leiðari. Tað merkist væl, at hann er ein toppspælari. Hann tosar nógv við venjaran um taktik og vit aðrir mugu bíða, um hann skal hava massagu, sigur René við einum smíli.
– Hann er skjótur at læra frá sær, tá vit gera ymiskt skeivt. Hann hevur spælt á høgra bakki og tí kann eg læra nógv av honum, sigur René, sum byrjar at blíva eitt sindur skeptiskur nú tríggir av fýra teimum føstu í verjuni eru úti.
Tannleyst Brøndby
Longu undan dystinum er lagt upp til torføran dyst fyri Brøndby. Fitti lítli maskotturin hjá Brøndby verður spurdur fyri opnari mikrofon, um hann væntar at Brøndby vinnur.
– Nei, er stutta og greiða svarið frá lítla dreinginum, til stóra gleði fyri vitjandi áskoðararnar hjá FCK.
Tað stutt av tí langa er, at FCK var nógv betri og tí vunnu teir 3-1. Brøndby spældi uttan hugflog í framrættaða spælinum, meðan verjan var ósikkur í tí mesta sum hon gjørdi.
FCK hevði eina ætlan í uppspælinum og tað endaði mangan við einum rennidysti millum annan av framherjunum hjá FCK móti einum Brøndby miðverja. Serliga Nikolaj Jørgensen spældi væl í álopinum hjá FCK.
Frederik Holst var at kalla ikki til staðar á høgra bakkinum. Hetta er plássið, sum René vil hava. Hann skal so ikki verða bangin fyri avrikinum hjá Holst í gjár. Tað var vánaligt saman við restina av verjuspælarunum hjá Brøndby.
Í álopinum hevði Brøndby Kenneth Zohore, sum einki fekk burturúr. Meðan áleypararnir hjá FCK arbeiða hart bæði í álopsstøðu og í verjustøðu, so megnaði Kenneth Zohore einki at gera um seg.
Brøndby kom á odda við frálíkum frísparki miðskeiðis í fyrra hálvleiki. Men bara minuttir seinni megnar verjan ikki at rudda vekk og so er 1-1. Áðrenn farið verður til hálvleiks er 3-1 og í báðum førum er talan um vánaligt verjuspæl.
Tá dómarin bríkslar fyri seinastu ferð er ongin ivi. FCK er betri enn Brøndby á degnum og vinnur uppiborið.
400 handtøkur
Eftirspælið av dystinum byrjar beinanvegin uttanfyri Brøndby Stadion. Løgreglan hevur avsperrað høvðusvegin til togstøðina í Glostrup, so FCK viðhaldsfólkini kunnu sleppa avstað fyrst. Hesum dámar ikki øllum viðhaldsfólkunum hjá Brøndby, sum gera vrøvl.
Tann eini, ein lágvaksin smáfeitur skallutur maður í 30’ unum, leggur eftir løgregluni, sum annars roynir at tosa pent við ótolu fólkini, ið vilja sleppa heim.
Við eitt hevur løgreglumaðurin fingið nokk. Hann tekur lágvaksna mannin inn í avsperraða økið og handtekur hann. Tveir vinmenn royna at steðga handtøkuni, men fáa eitt slag yvir fingarnar frá øðrum løgreglumonnum.
Soleiðis byrjar heimferðin, og eftir táragass, hundratlas handtøkur, ein langan umveg og bardaga á tokstøðini, endar heimferðin á midnátt.
Jú, Brøndby og FCK er nógv meiri enn ein fótbóltsdystur. Kanska for nógv meir enn ein fótbóltsdystur.
