Íslendska valutakreppan ber nú við sær, at støði ikki longu kann takast í danska kurstinum, um keypt verður við gjaldskortið í Íslandi Tað skrivar Føroya Banki á heimasíðu sínari.
Kortbrúkarar, sum gjalda við gjaldskortum, ið eru útgivin í danska ríkinum, verða í framtíðini avroknaðir sambært altjóða kursinum hjá Visa og MasterCard, sum hevur støði í kursinum hjá íslendska tjóðbankanum.
Broytingin er galdandi fyri Visa/Dankort og hesi altjóða gjaldskort, sum eru útgivin í danska ríkinum: Visa Electron, Maestro, MasterCard og American Express
Vanliga verða íslendskar krónur avroknaðar við meðalkursinum hjá danska tjóðbankanum, men av tí, at íslendskar krónur í løtuni ikki kunnu handlast um danska tjóðbankan og ikki eru dagliga noteraðar, verður umrokningin broytt til at hava støði í altjóða kursinum.
Kortbrúkarar, sum vilja síggja aktuella kursin á íslendskum krónum á gjaldskortum útgivin í danska ríkinum kunnu kanna kursin, sum íslendski tjóðbankin hevur gjørt upp, á www.sedlabanki.is.
