Fert tú at ferðast í Føroyum í summar – ella verður tað ein túrur av landinum?
- Mær dámar so væl at vera í Føroyum um summarið, so eg leggi einki í at fara av landinum, tá Føroyar vísa seg frá síni bestu síðu. Tá dámar mær betri at ferðast um veturin ella várið.
Tað sigur Ann Hermansdóttir.
- Maðurin og eg vóru ein túr á Gran Canaria í mars. Vit eiga eina dóttur, sum lesur í Danmark, so vit hava verið í Keypmannahavn og vitjað hana nakrar ferðir í ár. So fara vit øll - børn, svigerbørn og ommubarn og systir mín við familju - til Gran Canaria at halda jól í ár.
Sig eitt sindur um tínar ferðaplanir í ár?
- Eg fari í feriu eitt sindur fyri ólavsøku og til fyrst í august. Tá fari eg at slappa av saman við familjuni. Tað fyllir mín tanga at hugna mær saman við familjuni. Væntandi fara vit at gera nakrar útferðir í Føroyum, og hetta dámar okkum væl.
Ann Hermansdóttir sigur, at henni dámar eisini so væl ongar planir at hava, tá hon hevur feriu – og so bara taka tað, sum tað kemur.
Hevur tú ferðast í flestu oyggjum í Føroyum – ella er onkur oyggj eftir at vitja?
- Eg havi verið í flestu oyggjum í Føroyum, tó eru nakrar eftir. Havi til dømis ongantíð verið í Svínoy, og so havi eg heldur ikki verið í Mykinesi.
Hon vísir á, at einaferð hevði maðurin bjóðað henni ein túr við tyrluni út til Mykinesar at gista, men tíverri fekk tyrlan ikki lent, so tað varð av ongum.
- Men kanska verður tað í ár, at eg kann seta flugubein við at hava verið í Mykinesi, sigur Ann Hermansdóttir.
Hvønn týdning hevur tað fyri teg at sleppa út at ferðast?
- Sum familja hava vit ferðast nógv. Fyri nøkrum árum síðan áttu vit ein autokampara, og tá koyrdu vit suður ígjøgnum Evropa – til Gardarsjógvin.
Hon sigur, at tey eisini vóru við autokampara í Póllandi og Svøríki, og tey hava eisini ferðast nógv í Danmark.
- Mín dreymaferia er at vera sunnanfyri og sóla mær. Eri kanska eitt sindur óinteresant í so máta, tí eg leggi einki í at ganga á søvn og líknandi, tá eg havi feriu.
##med2##
Og Ann Hermansdóttir leggur aftrat:
- Nei, bikini, sólstól og sólkrem, so koyrir tað. Tá tað er sagt, so dámar mær eisini øgiliga væl at vera heima. Eri faktiskt rættiliga heimkær, so at hava feriu og vera heima á Tinghúsvegnum er - næstan - líka gott sum sólferia sunnanfyri, leggur hon aftrat.
Í VikuskiftisSosialinum, sum fæst til keyps í blaðsølunum, eru fleiri fólk spurd um sínar ferðaplanir í summar.
