Hvørja ferð favorittarnar úr HB komu í álop, so stóð verjan fyri. Sjónligastur var 39 ára gamli Egil á Bø. Hann hevur ikki vant nógv í ár, men játtaði at spæla í fjórðingsfinaluni móti HB.
EB/Streymur hevur síðani 2007 verið í steypafinaluni, men undan dystinum í gjár spáddu fleiri, at tíðin við EB/Streymi í oddinum í føroyskum fótbólti er fyribils komin til ein enda. Tað skuldi blíva staðfest við einum greiðum tapi fyri HB, sum hevur lagt seg á odda í landskappingini. Hóast HB hevði bóltin mest, so vóru Egil á Bø og hinir á EB/Streyma liðnum ikki sinnaðir at lata spádómarnar ganga út.
Eg eri ikki byrjaður aftur
Tað sigur Egil á Bø. Hann er eins og allir hinir á liðnum hjá EB/Streymi fegin eftir dystin í Gundadali. Í 120 minuttir gekk hann á odda í verjupartinum hjá EB/Streymi. Hann tók eingi óráð fyri og ruddaði bóltin vekk, tá vandi var á ferð. Fleiri ferðir royndi HB at spæla seg upp gjøgnum sína vinstru síðu. Gert Hansen hevði úr at gera á høgra bakki hjá gestunum, men hvørja ferð Gert ikki fekk fatur á bóltinum sjálvur, so kom Egil honum til hjáplar. Hann stútaði, skumpaði og sparkaði so HB ikki slapp fram til málið. Ein verjuskansi, sum hevur manglað á liðnum hjá EB/Streymi.
Verjan hjá EB/Streymi hevur verið mett sum veika liðið á liðnum, men sunnudagin vóru Egil á Bø og Marni Djurhuus saman við Rógva Egilstoft Nielsen, Gert Hansen og Rene Tórgarð tryggir í aftastu rekkju, meðan Pætur Dam Jacobsen og Arnar Dam arbeittu hart á miðvøllinum.
Tað kom fram fyrr á degnum, at Egil á Bø hevði funnið sær gaggurnar fram aftur.
– Eg havi játtað at spæla hendan dystin, men eg eri ikki byjaður aftur, sigur Egil á Bø.
Spurdur um hvørjari venjing hann er, svara hann skemtiliga.
– Eg vandi við fríggjadagin.
Lættin er at fáa eyga á. Egil hevur gjørt eitt lítið »comeback« í føroyskum fótbólti undir torførum umstøðum, og hann gjørdi sær alt annað enn fyri skommum.
– Eg havi spælt tveir dystir við 3. deild og ein við 1. deild. Eg havi eisini runnið mær nakrar túrar, leggur Egil afturat.
Hann verður ikki fastur partur av verjuni hjá EB/Streymi hetta kappingaárið, men tað er ikki óhugsandi at hann tekur onkrar dystir.
– Tað kann gott verða, at eg spæli onkran dyst afturat, sigur Egil.
At fyrsti dysturin, umframt at vera móti HB í Gundadali, eisini vardi í 120 minuttir, tekur hart upp á beinini á einum 39 ára gomlum mannin.
– Seinast eg spældi vi 3.deild, tað var ein leygardag, tá kom eg ikki fyri meg fyrr enn mikudag, sigur Egil við einum smíli.
So er spurningurin nær Egil verður til fólk aftur, eftir framúr avrikið í Gundadali?
Eitt er vist, Egil hevur framvegis nakað at geva føroyskum fótbólti.
120 málleysir minuttir
Hóast einki mál kom í 120 minuttir, so var talan ikki um nakran vánaligan fótbóltsdyst. HB var leikliga omaná og mundi hava fleiri skot á mál, meðan EB/Streymur við sínum skjóta spælið í umstillingini eisini kom til góðar møguleikar.
Størsta møguleikan í dystinum fekk Gunnar Zachariasen, tá rangstøðufellan hjá HB miseydnaðist. Hann gjørdist púra leysur móti Hans Jørgensen í málinum hjá HB, men Hans kom út í móti og fekk vart fyri royndini.
Fyri HB hevði Heini Vatnsdal ein stútara á tvørstongina, meðan Kristian R. Mouritsen og Fróði Benjaminsen vóru millum teirra, ið høvdu royndir móti málinum hjá Rene Tórgarð.
Dysturin var ferðmikil í so máta, at liðini gjørdu skjót av í álopspartinum, tá tey høvdu møguleika fyri tí.
Hetta gav fleiri spentar støður, har verjan og álopini runnu kapp um bóltin. Tó vann verjan í flestu førum hesar tvídystirnar. Báðar verjurnar spældu væl og tað gjørdu málverjarnir eisini.
Eg orkaði ikki at skjóta
Egil á Bø er royndasti maðurin á liðnum hjá EB/Streymi, men hevði als ikki hug at skjóta í brotssparkskappingini.
– Eg var nummar ellivu á listanum. Eg vildi ikki skjóta, tí eg orkaði ikki, sigur Egil og hyggur upp á Rene Tórgarð, sum nikkar.
– Rene stóð sum nummar tíggju á listanum. So eg hevði ikki hug at skjóta, staðfestur Egil.
Tað var heldur ikki neyðugt, tí teir, ið skutu, vóru allir tryggir úr ellivu metrum.
Sum altíð er við eini brotssparkskapping, so má onkur brenna fyri at annað liðið skal vinna. Hesa ferð fall tað Tróndi Jensen í lut. Brotssparkið hjá innskifta HB miðvallaranum brast á tvørstongina, og so kundi somuleiðis innskifti Niels Pauli Danielsen avgera alt við fimta og avgerandi brotssparkinum.
Tá hugsað verður um steypasøguna frá 2007, so mundu tey flestu nokk skilja, at nú gjørdi EB/Streymur tað aftur. Teir hava enn eina ferð havt hegni til at vinna ein avgerandi steypadyst. Spurningurin er so um Egil á Bø verður við, tá EB/Streymur spælir hálvfinalu. Hann hevur ikki tapt ein dyst í steypakappingini í fleiri ár. Hann var ikki við tá EB/Streymur tapti finaluna í 2009 og í 2011. Tað er vert at hugsa um, nú EB/Streymur hevur útsett niðurtúrin í føroyskum fótbólti.
