Vápnahvíldin í Gazageiranum verður ikki sett í verk, fyrr enn ísraelska stjórnin hevur atkvøtt fyri friðarætlanini.
Tað leggur Ísrael dent á.
Ymiskar mótstríðandi útsagnir hava verið um, nær vápnahvíldin millum Ísrael og Hamas kemur í gildi.
Egyptiska sjónvarpsrásin, Al Qahera, visti fyrrapartin í dag at siga, at vápnahvíldin longu varð sett í verk, men tað er ikki rætt.
Ísraelski forsætisráðharrin, Benjamin Netanyahu, fer at kalla ísraelska trygdarráðið saman klokkan 17 seinnapartin í dag.
Sum skilst, verður tað eftir hetta, at ísraelska stjórnin fer at atkvøða um friðaruppskotið.
Tað var annars í nátt, at amerikanski forsetin, Donald Trump, váttaði, at Hamas og Ísrael vóru vorðin samd um fyrsta stig í teirri friðarætlan, sum hann hevur skotið upp.
