Hóast felagsliðið úr sunnaru helvt av Suðuroynni hevði lotið undan í fyrra hálvleiki ímóti Víkingi í Sarpugerði ígjár, so gekk bert ein lítil løtu, og FC Suðuroy var longu í stríðum mótvindi. Liðskiparin hjá Víkingi, Atli Gregersen spældi í álopinum saman við Hjartvardi Hansen, og longu aftaná fýra minuttirs spæl syrgdu hesir báðir fyri, at Víkingur kom á sigurskós. Hjartvard Hansen var skjótur at gera sær dælt av einari verjuvillu, og so var FC Suðuroy aftanfyri við einum máli. Ein annar leirvíkingur framdi eitt satt einmansavrik, tá fyrri hálvleikur var hálvrunnin. Sølvi Vatnhamar fór framvið einari teggju av FC Suðuroy spælarum, og setti hegnisliga bóltin í netið til 2-0 til heimaliðið.
FC Suðuroy vaknaði – eina løtu
Nú sóu heimaáskoðararnir fyri sær eina málveitslu, men longu fýra minuttir aftaná næsta málið hjá Víkingi hevði FC Suðuroy svarað aftur. Verjuspælarin hjá FC Suðuroy, Heini Vatnsdal kom at standa leysur í brotsteiginum, og hann meddaði til bóltin, tá hann gjørdist leysur í Víkinga-brotsteiginum, og so var fyribils spenningur aftur í dystinum, men hesin hvarv skjótt. Víkingur ressaðist aftur, og tað sum eftir var av fyrra hálvleiki var heimaliðið omaná. Í Seinna hálvleiki legði Vìkingur aftur hart út, og suðuroyingar vóru trýstir. Evrard Blé sendi eitt fríspark á tvørstongina, og Hjartvard Hansen misnýtti ein stóran málmøguleika. Tá 20 minuttir vóru farnir av seinna hálvleiki vísti Kaj Leo í Bartalsstovu, at hann var inspireraður av 2-0 málinum hjá Sølva Vatnhamar, tá hann eisini rundbarberaði verjuna hjá FC Suðuroy við einum rimmar einmansavriki, sum eisini endaði við, at bólturin sat í FC Suðuroy málinum til 3-1, sum gjørdist endaliga úrslitið. Nú gera Víkingar klárt til eitt brak av einari grannauppgerð, tá ÍF vitjar í Sarpugerði um 9 dagar. Sama kvøld tekur FC Suðuroy ímóti B68 vesturi á Eiðinum í Vági, og har vónar felagsliðið at kunna bøta um ta ússaligu úrtøkuna á stigatalvuni, sum higartil bert hevur givið seks stig.
