Jóna Mortensen gjørdist alment kend, tá hon trein fram sum talsfólk hjá gomlum og óhjálpnum. Hon gav Heðini Mortensen ein skarpan gang, tí hon metti hann og Tórshavnar Kommunu at hava svikið tey veiku og gomlu.
Men nú situr hon sjálv í suppedasinum. Hon má versgóð fylgja tropp eftir boðunum frá Jørgen Niclasen um flatskatt og um at skatta pensjónir við inngjaldi heldur enn útgjaldi og soleiðis tryggja, at skattalætti verður veittur teimum vælbjargaðu.
Eitt er at brúka seg, men tað kann eisini henda, tá tú bjóðar teg fram, at tú fært vald. Jóna Mortensen hevur fingið vald. Men spurningurin er bara, um hon torir at brúka valdið, ella um hon – eins og Kaj Leo Johannesen – leggur seg skerflata fyri Jørgen Niclasen.
Men tað býttasta, sum man kann gera, tað er at sletta síni talgildu spor, so sum Jóna Mortensen hevur gjørt við at steingja sín Facebook-profil og sletta youtube filmar, hon hevði við gyltum vallyftum. Slíkt kann altíð sporast. Tað kann bara merkja, at hon hevur skift meining, og tú tekur undir við Niclasen-politikkinum hjá løgmanni.
Flatskatturin er legitimiteturin hjá hesi samgongu. Fellir uppskotið um flatskattin, so er samgongan rokin.
So er spurningurin, hvat hevur størri týdning hjá Jónu Mortensen.
