Tað er nú vorðið eitt lítið vet bíligari at vera føroyingur.
Ein uppgerð hjá Hagstovuni vísir, at frá 2012 til 2013, lækkaði prístalið, altso prísirnir, 0.6 prosent í miðal.
- Hetta er heilt øðrvísi prísgongd enn undanfarnu tvey árini, tá prísvøksturin hevur verið omanfyri tvey prosent, sigur Hagstovan.
Alt árið í fjør lækkaði prístalið úr 121,3 fyrst í árini, niður 120,6 annan ársfjórðing og síðani niður 120,0 triðja ársfjórðing og so aftur niður á 119,4 ímóti ársenda.
Í miðal hevur prístalið verið 120,3 í 2013, samanborið 121,1 í 2012.
Sostatt er prístalið í miðal lækkað 0,6 prosent í 2013.
Í 2012 vaks prístalið 2,1 prosent í miðal og í 2011 var hækkingin 2,3 prosent.
Størstu ávirkanina á príslækkingina hava prísirnir á býli, sum eru lækkaðir trý procent.
Tað er fyrst og fremst rentan á íbúðalánum, sum hevur drigið býliskostnaðin niður.
Rentan er er lækkað 7,8 prosent.
Annars er prísurin á brenniolju lækkaður 3,4 prosent, men hinvegin er prísurin á streymi hækkaður 3,1 prosent.
Prístalið er eisini lækkað í fleiri øðrum nýtslubólkum í 2013.
Prísurin á samskifti er lækkaður 2,9 prosent og á innbúgvi, húsbúnaði og øðrum er hann lækkaður 1,3 prosent.
Hinvegin eru prísirnir á klæðum og skóm hækkaðir 1,3 prosent og prísirnir á hotellum og matstovum er hækkaður eitt prosent.
Eisini matur er vorðin 0,4 prosent dýrari í fjør.
- Hetta er væl minni enn í 2012, tá matvøruprísirnir hækkaðu 1,8 prosent. Tað eru serliga kjøt- og grønmetisprísirnir, sum eru uppfarnir í 2013, sigur Hagstovan.
|
