Fyri fyrstu ferð í 10 ár hevur Sävehof vunnu grundspælið í bestu svensku hondbóltsdeildini.
Elias Ellefsen á Skipagøtu skoraði tvey mál fyri Sävehof sum á heimavølli í dag vann sannførandi 33-24 sigur á Hallby. Í steðginum var Sävehof á odda 17-14.
Endaspælið er skipað soleiðis, at átta tey bestu liðini í grundspælinum vinna seg í fjórðingsfinalurnar har spælt verður best av fimm dystum.
Nummar eitt møtir nummar átta í fjórðingsfinalunum, nummar tvey møtir nummar sjey, nummar trý møtir nummar seks, og nummar fýra møtir nummar fimm.
Sävehof møtir Eskilstuna í fjórðingsfinalunum, ið verða spældar seinni í mars.
