Erik ten Hag: Dómarin ávirkaði dystin

Fult umfar hevur verið í Premier League um vikuskiftið. Arsenal er framvegis fimm stig fremst, Liverpool stóð fyri óvæntaða tapinum og venjarin hjá Manchester United er ónøgdur við dømingina.

Arsenal vann í dag 3-0 á Fulham, eftir at Manchester City legði trýst á við at vinna 1-0 á Crystal palace í gjár. Arsenal er framvegis fimm stig fremst og fyri hvørt umfar nærkast meistaraheitið, sjálvt tað er langt vekk.

Manchester United hevur meldað seg úr meistarastríðnum við at tapa 7-0 móti Liverpool, og bara fáa málleysan javnleik móti botnproppunum Southampton á Old Trafford í dag. Casemiro fekk sítt annað reyða kort síðani skiftið frá Real Madrid. Hetta er venjarin ikki nøgdur við.

- Dómararnir løgdu út við at siga, at hetta er Premier League og tað er loyvi at spæla hart og við ferð. Casemiro hevur spælt 500 dystir í Evropa uttan at fáa beinleiðis reytt kort. Hann hevur nú fingið tvey. Casemiro spælir hart, men rættvíst, sigur Erik ten Hag, sum ikki er nøgdur við dømingina í dag.

- Dómararnir ávirkaðu dystin í dag, sigur hann og vísur eisini til nakrar støður í brotsteingum hjá Southampton.

Liverpool var stórfavorittur at vinna á AFC Bournemouth, eftir stórsigurin á Manchester United, men har var ongin luft í ballónini. Heimaliðið vann 1-0 og vann seg úr botninum.