- Vit hava tíverri gjørt av at lata Etika í Danmark aftur, sigur Johannes Jensen, stjóri á Hotel Føroyum, sum er ein av eigarunum av føroysku sushi-matstovuni í Keypmannahavn.
Tað var í januar í ár, at Etika lat upp - grundað á væleydnaðu royndirnar hjá Etika í Føroyum.
- Etika í Danmark liggur í »minefeltet«, sum økið verður kallað, og byggir virksemið hjá Etika í Danmark tí á eitt væl breiðari grundarlag enn tað, sum Etika í Føroyum byggir á, sigur Johannes Jensen, sum vísir á, at flestu viðurskiftini hava gingið væl og eydnast væl við Etika í Danmark.
- Eitt nú hevur matstovan fingið rós og havt nógv vitjandi. Men álvarsamir trupulleikar hava tó verið - eitt nú við leiðsluni á staðnum, og førdi hetta til, at nýggj leiðsla varð sett, sigur hann.
Men nú er so kortini avgerð tikin um steðga, meðan aðrir møguleikar verða kannaðir saman við útleigara og nýggjum lokalum íleggjarum, og tí er ein lítil møguleiki fyri, at matstovan heldur fram undir nýggjum formi og kanska nýggjum eigarum.
Etika í Keypmannahavn og Etika í Havn hava tó einki uttan navnið og konseptið í felag, og Etika á Áarvegnum í Havn gongur væl betri enn væntað, sigur Johannes Jensen.
