Stórtapið í Runavík ber við sær, at europeisku atgongumerkini hanga í klønum tráði hjá B36, sum fær vitjan av TB, ið vísti góðan hugburð ímóti AB.
Talan var um orduligan bummtúr, tá ið B36 sunnudagin var við Løkin í Runavík. Úrslitið var 4-0 tap, og tað sveið illa, at Róaldur Jacosben, sum higartil í ár hevur verið tann drúgvasti av øllum, tíðliga í 1. hálvleiki varð vístur av vøllinum og harvið er leikbannaður sunnudagin, tá ið TB vitjar í Gundadali.
Setningarnir eru ymiskir, hóast tað er felags, at tað ikki er bara upp til liðini sjálvi at gera av, um tað skal bera til at røkka málið.
Í B36 snýr tað seg um bronsuplássið og europeiska luttøku. Árstalsfelagið er eftir tapið í Runavík á fimta plássi. Hjá TB er setningurin at varðveita plássið í bestu deildini. Ímóti AB var hugburðurin framúr góður, og Ragnar Tausen skoraði bæði málini í 2-0 sigrinum.
Hjá B36 er Lukasz Cieslewicz tøkur aftur, eftir at hann fyri viku síðani var leikbannaður. Vinstri vongverjin, Símun Joensen, hevur leingi verið skaðaplágaður. Hann er farin at venja aftur og verður eftir øllum at døma í hópinum hesa ferð.
Hjá TB er tað dyggur smeitur, at miðvallararnir Ndende og Martin Tausen eru leikbannaðir. Teir hava higartil í ár verið millum teir drúgvastu. TB hevur bara vunnið eina ferð á útivølli í ár – 3-2 ímóti KÍ. Tá ið TB var í Gundadali og spældi ímóti B36 í fjórða umfari var úrslitið 1-1!
