Veljarin er ikki í iva. Føroya skulu býtast sundur í sjey kommunur. Tað er greiða niðurstøðan í veljarakanningini, sum Gallup Føroyar hevur gjørt fyri Sosialin.
Samlað halda 35 prosent av føroyingum, at Føroyar skulu verða sjey kommunur. Tað eru bara 8 prosent sum halda, at tali av kommunum skal vera 30, sum tað er í dag. Hinvegin halda bara 6 prosent, at Føroyar skulu vera ein kommuna.
Taka vit øki fyri øki, so eru tað suðuroyingar, sum í størstan mun halda, at Føroya skal býtast í sjey kommunur, tí 41 prosent av suðuroyingum halda tað. Hinvegin eru tað 28 prosent í Vágum, sum er samd í hesum, meðan talið í øllum hinum økjunum liggur har ímillum.
Taka vit flokkarnar, so eru fólk í ymsu flokkunum rímuliga samd um hesar sjey kommunurnar. Helmingurin av sjálvstýrisveljarunum halda tað, meðan 40 prosent av tjóðveldisveljarunum halda tað sama. Hjá Framsókn er talið 47 prosent, hjá Fólkaflokkinum 37, Javnaðarflokkinum 36, Sambandsflokkinum 33, meðan talið er minst hjá Miðflokkinum. Av teirra veljarum halda 26 prosent, at Føroyar skulu skipast í sjey kommunur.
