ÍF Føroyar hevur fingið harða kapping um føroyska leikaratilfeingið í Keypmannahavn.
Hondbóltsfelagið á Frederiksberg, FIF, hevur fimm føroyskar leikarar á mansliðnum, meðan Ajax København hevur ein mansleikara og tríggjar kvinnuleikarar.
Les eisini:
Eirikur og hinir í FIF: Jú fleiri føroyingar jú betri'
Brandur til stórt danskt felag
Ársins leikari eisini til Ajax
Í gjár spældu mansliðini hjá feløgunum báðum, ið bæði spæla í næstfremstu donsku deildini, venjingardyst. Undan kappingini verður Ajax styrkismett heldur væl frægari enn FIF, men hetta sást ikki henda dagin.
Á síni Facebooksíðu skrivar FIF at ein sterk verja og góðir málverjar tóku pippið frá Ajax, og eftir lítlari løtu var 11-4 til uppflytararnar úr FIF, ið henda dagin høvdu Róa Berg Hansen, Jónas Gunnarsson Djurhuus og Niklas Højgaard Hanusarson á liðnum. Tóraldur Kollsker og Eirikur Simonsen spældu ikki við.
Ajax, við Brandi Halgirssyni á liðnum, kom ongantíð veruliga ígongd, og endin var ein greiður sigur til teir tríggjar føroyingarnar í FIF við úrslitinum 30-21.
Mansliðini hjá Ajax og FIF spæla fyrstu landskappingardystirnar ávikavist 31. august og 1. september
Besta kvinnuliðið hjá Ajax spælir sín fyrsta dyst í fremstu deildini 31. august, og spurningurin er um onkur av teimum trimum føroyingunum, Magna Tórðardóttir, Anna Brimnes og Marianna Geirsdóttir Eystberg verða í hópinum.
