Tað vera Fílabeinsstrondin og Nigeria, ið koma at spæla finaluna um afrikanska meistaraheitið í fótbólti hjá monnum komandi sunnukvøld klokkan 20.
Vertslandið, Fílabeinsstrondin vann 1-0 á Fólkaræðisliga Lýðveldinum Kongo í hálvfinaluni. Sebastien Haller gjørdist stóra hetjan tá hann skoraði sigursmálið í 65. minutti.
Nigeria vann 5-3 á Suðurafrika aftaná longda leiktíð og brotssparkskapping.
William Troost-Ekong legði Nigeria á odda tá 67 minuttir vóru leiktir. Heilt móti dystarenda javnaði Teboho Mokoena við einum brotssparki, og so mátti longd leiktíð til.
Í longdi leiktíðini kom einki mál. Í brotssparkskappingini skoraði Nigeria upp á fýra av fimm brotsspørkum, meðan Suðurafrika bert skoraði upp á tvey av fýra brotsspørkum.
Leygarkvøldið klokkan 20 spæla Suðurafrika og Fólkaræðisliga Lýðveldið Kongo dyst um bronsuna.
