Fimleikur
Ein av ítróttagreinunum, sum Føroyar ofta hava fingið sera góð úrslit í, er fimleikur. Tá Oyggjaleikirnir vórðu hildnir á Gotlandi, var fimleikurin tó ikki á skránni, og sum vera man, var hetta nakað, sum harmaði føroysku luttakararnir nógv.
Vinarlagið sigraði
Heilt uttan avbjóðingar var fimleikafólkið tó ikki. Føroyingar vóru nevnliga ikki tey einastu, sum harmaðust um, at fimleikurin varð tikin av skránni. Heldur enn at sita hendur í favn, varð tí gjørt av, at ein serstøk kapping skuldi skipast millum tey lond, sum høvdu áhuga í at taka lut í hesum. Friendly Games varð hendan kappingin kallað, og beint undan ólavsøkuni fór føroyska ferðalagið av stað til Ynos Mon, sum hevði átikið sær vertsleiklutin.
Úrslitini, sum føroysku fimleikararnir fingu, vóru eisini framúr. Trý gull-, átta silvur- og eitt bronsumerki var úrtøkan hjá teimum vaksnu, tá alt varð talt saman, og harumframt høvdu juniorarnir eisini vunnið trý heiðursmerki. Ikki minst skaraði Helgi W. Olsen framúr, og stóð hann einsamallur fyri teimum trimum gullmerkjunum, umframt at hann eftir kappingina fekk handað steyp sum besti íðkarin hjá monnum. Eisini stóðu Høgni Øster og Marina Moraitis seg rættiliga væl.
Rokna við Helga
Júst Helgi er helst eisini størsta vónin hjá føroyingum. Ikki bert grundað á góðu úrslitini frá Ynos Mon, men eisini tí hann síðani hetta hevur gjørt rættiliga nógv við venjingina. Seinastu fýra árini hevur Helgi nevnliga lisið í Danmark undir sonevndu Team-Danmark skipanini, har útbúgvingin verður løgd soleiðis til rættis, at stundirnar at venja eru rættiliga góðar. Sum skilst hevur Helgi vant einar 20 til 25 um vikuna, og vónandi sæst hetta eisini aftur í avrikunum, tá kappast skal.
Varin venjari
Venjari hjá føroyska liðnum er danin, Henrik B. Bertelsen, sum eisini er í starvi innan menningina av ungum fimleikarum í Danmark.
Hann hevur verið í Føroyum nakrar ferðir, har hann hevur havt venjingar við landsliðnum, og eisini hevur hann verið uttan fyri landoddarnar á venjingarlegu.
Fyri góðum mánaði síðani hittu vit Henrik á máli, og hóast hann ásannaði, at úrslitini hava verið góð áður, so mælti hann tó til varsemi, tá metast skuldi um møguleikan fyri heiðursmerkjum.
- Eg krevji bara, at fimleikararnir gera sítt besta. Meira kann eg ikki krevja, vóru boðini frá venjaranum, sum samstundis legði dent á, at hann einki visti um, hvussu hini londini hava ment seg, síðani kappast varð seinast.
Hvussu er og ikki, so munnu tey fægstu ivast í, at ein hin størsta vónin um føroysk heiðursmerki er hjá fimleikinum, men um tey verða eins nógv í tali, sum tey vóru á Ynos Mon, er kanska meira ivasamt.
Í kassa fyri seg
Heiðursmerki í Fimleiki á Ynos Mon ?99
(Fimleikur var ikki á Oyggjaleikunum hetta árið, men skipað varð kortini fyri sonevndum Friendly Games í fimleiki millum Jersey, Isle of Man, Ynos Mon, Gibraltar, Áland og Føroyar)
Gull: Helgi W. Olsen bundin kapping, gólv
Helgi W. Olsen bundin kapping, lop
Helgi W. Olsen frí kapping, gólv
Silvur: Marina Moraitis bundin kapping, gólv
Liðkapping, kvinnur gólv
Liðkapping, menn gólv
Liðkapping, menn lop
Høgni Øster frí kapping, gólv
Helgi W. Olsen frí kapping, ringar
Helgi W. Olsen frí kapping, lop
Høgni Øster frí kapping, rekk
Bronsa: Liðkapping, kvinnur lop
Høgni Øster bundin kapping, lop
Mynd av venjing
Henrik B. Bertelsen hevur fleiri ferðir verið í Føroyum, har hann hevur díkt á fimleikararnar, sum nú fara at royna seg á Oyggjaleikunum
Mynd: Álvur Haraldsen
Myndir av fimleikarum
Marit Magnussen
Mia Káradóttir
Susan P. Olsen
Marjun Persson
Anita Knudsen
Durita Knudsen
Marina Maraites
Helgi Winther Olsen
Høgni Øster
Tórarin Holm Petersen
Pól Esper Hanusson
Høgni Andersen
Magni Jacobsen
