Fiskimannafelagið krevur skatta­hækk­ing fyri fiskimenn!

Óli Jacobsen, fyrrverandi formaður í Føroya Fiskimannafelag

-----------------------

Tað kann vera torført at stað­festa, hvussu veruliga gongdin hevur verið, síðan formansskifti í FF, tí kunn­ingarvirksemið hjá felag­num, sum frammanundan var tað størsta hjá nøkrum fakfelag í landinum, er mest sum burturdottið við skifti­num.

Sjálvt ikki ársfrágreið­ingin fyri 2007 er atgongilig á heimasíðu felagsins. Tað er júst í eini slíkari árs­frá­greiðing, at kósin hjá einum felag skal lýsast. Men tað skal bøtast um hetta í hesi grein.

Skrivligi parturin av fyrstu ársfrágreiðingini hjá Jan Højgaard fyllir 4-5 síður.

Stutt kann sigast, at hon lítið meira enn eitt uppkók av tí, sum hann førdi fram undan formansvalinum.

Tað sæst ikki, at nøkur serlig ítøkilig stig eru tikið til at loysa tey mál, sum Jan Højgaard segði seg leggja so stóran dent á.

Starvsfólk á trygging er “brotsmannalið”

Ársfrágreiðingin saman við tí sindri, sum er lagt á heima­síðuna hjá FF lýsir væl arbeiðsháttin hjá Jan Høj­gaard.

Eitt mál, sum hann koyrdi nógv upp á til valið, var tryggingarviðurskifti. Her skuldi so verið nóg mikið at farið í holt við. Tað sæst ikki, at nakað ítøkiligt er gjørt í 2007.

Men hinvegin verður lagt eftir tryggingini og hennara starvsfólki. Hon verður løgd undir “ágang móti fiski­monnum” og tey, sum standa aftanfyri, “skuldu fingið harða revsing” fyri sínar “óndu skarnsgerðir” móti fiskimonnum.

Á heimasíðuni varð sagt seinasta ár:

”(Tað) hoyrist í dagligari talu, at tryggingin verður sam­mett við brotsmannalið. Eisini hevur verið frammi, at starvsfólk hjá tryggingini fáa bonus, um tey gera eitt gott arbeiði. Um so er, so kunnu vit spyrj,a hvat merk­ir gott arbeiði? Merkir tað, at um ein sparir tryggingini pengar, so hevur ein gjørt eitt gott arbeiði? Líka mik­ið, um viðskiftafólkið hevur rætt til eitthvørt endur­gjald?”

Sum tað sæst, verður dúg­liga róð upp undir, at starvs­fólk fáa egnan vinning burt­ur úr at nokta við­skifta­fólk­um tað endurgjald, tey hava rætt til!

Forfylgdur fólkabólkur

Í einum øðrum broti verða fiskimenn sammettir við ein forfylgdan fólkabólk í Burma, har stýrið er kent fyri sítt harðræði. Sambært Jan Højgaard er motivið bæði her í Føroyum eins og í Burma ”óndskapur, og fúl­ar og andstyggiligar lygn­ir.”

Í hesum sambandi verður eisini sagt:

”Tað, at tað hevur eydnast almennu kraddarunum at fáa so nógvar føroyingar at hata fiskimenn, fyllir ein við ræðslu. Tí, tá tú fært slongt líkt og ólíkt upp í and­litið, so lýsir hatrið eisini av teirra eygum.”

Í einum øðrum sambandi verður sagt:

”Tað er sera strævið at fund­ast við almennar nevnd­ir. Tú situr har einsamallur millum eina fjøld av al­­menn­um kraddarum, sum einans hava eitt endamál, og tað er at súgva sum mest til sín, sum okkara heiður­ligu fiskimenn forvinna. Tey… skuldseta fiski­mann­in fyri bæði líkt og ólíkt…”

Í samband við ALS verð­ur sagt, at tað er “ónd­skap­ur”, sum ger at fiskimenn í ávísum førum einki fáa.

Fiskimenn sum ólukkudýr

Høvuðsendamálið hjá Jan Højgaard tykist vera at gera fiskimenn til ólukkudýr, sum verða hataðir av restini av samfelagnum.

Tað sama er við fiski­mannakonum. Sagt verður, at “hvørja viku ringja grát­andi kvinnur” til FF.

Eg havi sjálvur tosað við hundraðir, kanska túsundir, av fiskimannakonum gjøg­num árini. Eingin teirra hevur grátið!

Tað tykist, sum at Jan Høj­­gaard livir í eini fantasi­verð av meira ella minni upp­­funnum fíggindum, sum hann so skal berjast ímóti - í leysari luft.

Her er eitt orðalag, sum ikki hevur sæð sín líka í eini ársfrágreiðing.

Hetta kann bert skaða um­dømið hjá felagnum og seta restina av samfelagnum upp ímóti fiskimonnum. Úrslitið verður hareftir.

Samráðingarnar

Patentloysnin hjá Jan Høj­gaard er at leggja flotan uttan mun til hvat mál, tað snýr seg um! Verkfall verð­ur nevnt í minsta lagi eina­ferð á hvørji síðu í árs­frá­greiðingini.

Fyrsta stóra royndin í so máta var samráðingarnar við Reiðarafelagið herfyri.

Jan Højgaard lovaði fiski­monnum, at uttan mun til hvørjar broytingar, teir ynsktu í sáttmálanum, so skuldi hann fáa tær framdar, sum um samráðingar vóru eitt sjálvtøkuborð!

Hann boðaði eisini frá á heimasíðuni hjá FF, at “tá ið samráðingar verða við reiðararnar í heyst, fara fiski­menn at krevja, at hýru­prosentið verður munandi hækkað. Fiskimenn skulu nú hava munandi meiri í inntøkum. Tað verður eitt treytaleyst krav...”

Áhaldandi hóttanir

Sum tað skiltist, vóru sam­ráðingarnar herfyri ein áhald­andi hóttan um at leggja flotan grundað á krøv, sum sjálvsagt fekk reið­arafelagið at koma við til­svarandi mótkrøvum.

Verkfall varð enntá lýst, áðrenn semingsstovnurin kom uppí, sum neyvan er hent fyrr. Tað tykist at vera greitt, at frá byrjan av var áhugin fyri verkfalli størri enn áhugin fyri semju.

Nú endaði so verkfallið við einum kontantum úrsliti upp á 5 krónur um dagin upp á eftirlønina, har kravið upprunaliga var 200 krónur. Fyri árið er hetta 1.000-1.500 krónur. Hetta er minni, enn fiskimenn hava mist hvønn einstakan fiski­dag, teir lógu av verk­falli­num.

Skal ikki siga, at meira kundi fingist burtur úr. Men ein og hvør annar sam­ráð­ingarleiðari hevði kunnað fingið hetta úrslit - uttan verk­fall. Áðrenn verkfallið varð lýst, høvdu reiðarar bjóð­að sær at sleppa spurn­inginum um oljuna. Teir høvdu eisini meira ella minni bjóðað 5 krónur fyri hvønn mannin í eftirløn um dagin. Umframt hetta fekst so eisini stytting av túra­longd. Men hetta eru mál, sum fyrr hava kunnað verið loyst uttan verkfall.

Krevur skattahækk­ing fyri egnar limir!

Í ársfrágreiðingini er eingin umrøða av Samtak, sum Jan Højgaard hevur krøkt seg uppí, uttan at tað sæst, at hetta á nakran hátt hevur gagnað fiskimonnum. Tað er heldur hin vegin.

FF kann hava fleiri felags áhugamál við arbeiðara­feløgini, men ikki øll.

Hetta sást, tá ið Samtak, eisini vegna FF, kravdi sam­tykta skattalættan fyri 2008 afturtiknan. Har kundi ein skilja arbeiðarafeløgini, tí hesin skattalætti var nærum eingin fyri arbeiðara­inn­tøkur.

Fyri fiskimannainntøkur var hesin lætti um 6.000 krónur – ella fimm ferðir vinningin í nýggja sátt­mál­anum. Henda skattalætta krevur formaðurin í FF tiknan aftur!

Hetta krav er endurtikið í tí ynskilista, sum Samtak hevur sent komandi sam­gongu, har tað eisini verður kravdur progressivur komm­unuskattur, sum bert kann merkja enn størri skatt fyri hampiligar fiski­manna­inn­tøkur.

Hetta kann ikki merkja nakað annað enn, at Jan Højgaard arbeiðir beinleiðis ímóti áhugamálum hjá fiski­monnum.

Veruleikin er kanska, at tað eru uttanfelagsfólk, sum í veruleikanum lýsa sjónar­miðini hjá Fiski­manna­felagnum.

Virksemið er skorið inn á bein

Stutt kann sigast, at virk­semið hjá FF sum heild er skorið inn á bein, og felagið er harvið sett mong ár aftur í tíðina. Sjálvt upplagda upp­gávan at vera partur av skipanini fyri prísáseting á ráfiski, sum er uppbygd av FF frammanundan, er slept.

Sjálvsagt er nógv, sum kann gerast betri fyri fiski­menn, men tað verður neyv­an eftir hesi uppskriftini. Mál kunnu bert loysast við einum miðvísum arbeiði fyri at undirbyggja síni sjón­armið. Hetta krevur før­leika, sum ikki er nøkur sjálv­fylgja.

Hetta gerst so ikki við at seta øll í samfelagnum upp ímóti fiskimonnum, sum tað verður gjørt.