Nú eru kommunalu samstarvsøkini um barnavernd endaliga skipað
Annika Olsen, landsstýriskvinna í almannamálum, hevur góðkent, at tað nú verða átta kommunal samstarvsøki um barnavernd.
Frammanundan hava tað verið 10 samstarvsøki.
Við hesum eru tvey nýggj kommunal samstarv skipaði og góðkend. Tær sjey kommunurnar í Suðuroy eru komnar ásamt um, hvussu ein barnaverndartænasta verður skipað í Suðuroy.
Eisini hava Eysturkommunu og Fuglafjarða kommunu gjørt eina samstarvsavtalu um barnavernd.
Løgtingið samtykti í 2012 at gera broytingar í barnaverndarlógini, og tá varð m.a. álagt kommunum at skipað seg í færri samstarvsøki við freist frá 1. januar 2014.
Tey átta økini eru hesi:
1) Kommunurnar í Norðoyggjum
2) Runavíkar, Nes og Sjóvar kommunur
3) Eysturkommuna og Fuglafjarðar kommunur
4) Sørvágs, Vága, Vestmanna og Kvívíkar kommunur
5) Eiðis, og Sunda kommunur
6) Tórshavnar kommuna
7) Kommunurnar í Sandoynni
8) Kommunurnar í Suðuroynni
