NAPA, sum er mentanarstovnur undir Norðurlendska ráðharraráðnum og hevur sæti í grønlendska mentanarhúsinum KATUAQ, hevur nú skipað seg við Bergi Berg ú Føroyum sum stýrisformanni. Ein av høvuðsuppgávunum hjá NAPA er at byggja brýr ímillum Grønland og Norðurlond, við at stuðla og birta undir mentanarvirksemi. - Á fundi í síðstu viku skipaði stýrið fyri NAPA seg við Bergi Berg sum formanni. Bergur er í starvi sum fulltrúi í Mentamálaráðnum og hevur umboðað Føroyar í stýrinum í nøkur ár. - Norðurlandaráðið velur stýrið fyri tvey ár í senn. Í stýrinum eru fimm fastir limir og tríggir tiltakslimir, ein úr hvørjum av teimum fimm norðurlondunum og teimum trimum londunum við sjálvstýri. - NAPA er virkin sum stuðul og íverksetari í grønlendska mentanarlívinum. Listafólk úr øllum norðurlondum, eisini úr Føroyum, hava verið við í tiltøkum í Grønlandi, ella í tiltøkum um Grønland, sum NAPA hevur stuðlað ella staðið fyri. - NAPA leggur dent á at stuðla mentanartiltøkum, sum varpa ljós á Grønland í norðurlondum og grannaøkjunum, ella sum varpa ljós á norðurlond og grannaøkini í Grønlandi, umframt tiltøk fyri børn og ung í Grønalndi. Mats Bjerde úr Svøríki er stjóri í NAPA, har tvey onnur fólk arbeiða. Raksturin, ið fyrst og fremst er stuðul til mentanartiltøk, ella tiltøk sum NAPA sjálvur stendur fyri, er nakað omanfyri sjey milliónir um árið. | 
Fótbóltur
