Í døgunum 14.-21. oktober 2022 skipa Tórshavnar kommuna og Útlendingastovan fyri Fjølmentanarviku, sum er eitt landsfevnandi átak, ið hevur til endamáls at fagna fjølmentan í Føroyum.
Fjølmentanarvikan er ein mentanarvika, ið leggur upp til at fagna, fevna og varpa ljós á mentanarliga margfeldið í føroyska samfelagnum. Tórshavnar kommuna og Útlendingastovan standa fyri tiltakinum.
Á enskum er heitið Multicultural Week. Tórshavnar kommuna hevur áður skipað fyri Diversity Week, men í ár er átakið landsfevnandi og kommunur kring alt landið eru bodnar at luttaka.
##med2##
Endamálið við Fjølmentanarvikuni er at kveikja forvitni um aðrar mentanir og styrkja sambond millum mentanir á ein lættan og jaligan hátt. Fjølmentanarvikan er fyri allar borgarar í Føroyum.
Ein hugskotsskjátta er framleidd til endamálið. Hugskotskjáttan er eitt savn við uppskotum til tiltøk og spøl, ið er tøk til øll at nýta. Hugskotskjáttan liggur á torshavn.fo og integration.fo og inniheldur alskyns hugskot, ið kunnu brúkast eitt nú í einum undirvísingartíma, sum upphiting í einum ítróttafelagi ella sum upplegg til kjak.
##med3##
Nógv og fjølbroytt tiltøk eru á skránni í vikuni, so sum, familjutiltak, Mentanarstevna, dansiverkstova, koncertir, World Food matmarknaður, endaveistla við diskara og nógv annað.
Skráin er livandi, og verður dagførd mestsum dagliga, so hvørt sum fleiri bjóða seg fram við tiltøkum. Til ber at fylgja við á: torshavn.fo og integration.fo.
##med4##
Hugsanin er at øll kunnu luttaka í fjølmentanarvikuni. Til ber at luttaka saman við vinum, familju, starvsfelagum ella øðrum. Um tú hevur hug at leggja eitt tiltak til rættis, so ber til at senda kunning um tiltakið til: [email protected]. Um tiltakið er alment, so kemur tað við á yvirskipaðu skránna fyri fjølmentanarvikuna. Ein grafikk pakki liggur eisini á torshavn.fo og integration.fo til tey ið vilja marknaðarføra síni tiltøk i vikuni, ella ynskja at fagna fjølmentanini í Føroyum á sosialu miðlunum. Øll eru vælkomin at nýta grafikkpakkan til at gera framløgur ella leggja út myndir og tilfar á sosialar miðlar.
##med5##
##med6##
