Nú vit eru komin í myrku tíðina eru tey ivaleyst nógv, sum hava livandi ljós tendrað í heiminum. Men tað er umráðandi at verða ansin og taka tey neyðugu atlitini so, at trygdin heima við hús er í lagi.
Fríðálvur Jensen, fyrrverandi starvsfólk hjá Betri Trygging, hevur drúgvar royndir við at tryggja hús á hendan hátt og hann heldur tað vera sera umráðandi at hugsa um fyribyrging.
- Í fyrru helvt av 90´unum, var alt hetta viðvíkjandi fyribyrging ikki tað stóra, men vit vóru nøkur, sum veruliga vildu fáa boðskapin út til borgararnar, sigur Fríðálvur Jensen og vísir á hesi góð ráð til at tryggja heimið.
Lat okkum minnast:
- Tryggjað tykkum væl við roykvarnarum, og skiftið battaríir í verandi varnarum – 1. desember á hvørjum ári.
- Havið í minsta lagi ein eldsløkkjara á høgligum stað og tryggið tykkum, at hesin er í lagi.
- Havið eitt brandteppi á høgligum stað.
- Havið eina hondlykt – t.d. har tit velja at hava eldsløkkjara og brandteppið hangandi.
- Leggið eina ætlan fyri, hvørja rýmingarleið tit eiga at velja.
- Farið ongantíð út frá brennandi kertuljósum.
- Latið ongantíð smábørn vera einsamøll við kertuljósum.
- Nýtið altíð eldfastar stakar.
- Tað er skilagott, at hava eina kannu við vatni, har kertuljós o.a. eru tendrað.
- Ansað væl eftir, at vatn ikki stoytt á grýtu við feitti, tí so hendir ein sokallað dampeksplosión, og eldurin verður tveittur um alt rúmið og á menniskju, sum eru í nánd.
- Takið endiliga ikki grýtuna av komfýrinum.
- Køvið við einum loki ella brandteppi og skrúva niður fyri hitanum.
- Er eldur komin upp undir eymhettuna, má ein tryggjað sær, at eldurin ikki er farin víðari.
Fýrverk:
- Farið ongantíð undir heimagjørt fýrverk – t.d. rørbumbur o.a.
- Ikki ganga við fýrverki uppi á tær.
- Nýt trygdarbrillur!
