Um eingin savnar, fer nógv gamalt fyri skeytið, og soleiðis hevði eisini verið við nógvum gomlum bátamotorum, um ikki menn norðuri í Sundunum høvdu tikið hond um teir.
Ein forvitnislig framsýning á sjómannadegnum í Klaksvík fevnir um einar 20-25 gamlar bátamotorar og nakrar gamlar viðfestimotorar.
Framsýningin er í niðastu hæddini í bygninginum, har Berglon hevur sítt virksemi, og her var stórur áhugi - serliga millum eldri menn - at síggja hesar motorar.
Ein eldri maður, ið In.fo skifti orð við, segði, at elstu motorarnir helst tátta í eini 80-100 ár, og hann helt, at elsti motorurin er frá síðst í 1920-unum.
Eisini onkur av viðfestimotorunum er rættiliga gamal, og onkur søga er eisini um motorar av sama slagi, sum onkur av viðfestimotorunum á framsýningini.
Sum skilst, eru fleiri av motorunum hjá sundamonnum eisini mekaniskt í standi og kunnu setast í gongd. Allir eru teir vælmálaðir og eitt rættiligt prýði á einum savni.
