Tað stóð á gomlum nøglum tá Hákun West av Teigum og liðfelagarnir í Füchse Berlin spældu dyst á útivølli móti Lemgo í týsku bundesliguni.
Tað stóð á jøvnum 33-33, men í allarseinasta sekundinum syrgdi Mathias Gidsel fyri, at Füchse Berlin vann dystin 34-33, og hongur í stríðnum um annað plássið, og harvið luttøku í Champions League komandi kappingarár. Í steðginum var Füchse Berlin á odda 17-15.
Hákun fekk tríggjar málmøguleikar og hann setti allar í netið.
Fyrr í dag vann THW Kiel uttan Elias Ellefsen á Skipagøtu á útivølli 34-27 (19-14) á Hamburg.
Füchse Berlin er nummar trý í deildini við 44 stigum. Füchse er eitt stig aftanfyri Flensburg-Handewitt. THW Kiel er nummar fimm við 39 stigum.
Magdeburg er greitt oddalið við 52 stigum nú bert seks umfør eru eftir at leika.
