17.686 fólk á Brann leikvøllinum í Bergen sóu heimaliðið, Brann Bergen vinna 2-1 á Sarpsborg í tí seinasta dystinum, sum var spældur hetta kappingarárið í norsku tippuliguni.
Gilli Rólantsson spældi allan dystin fyri Brann Bergen, og talan gjørdist um ein góðan dag hjá Gilla, sum skoraði til 2-0 tá 43 minuttir vóru farnir av dystinum. Ein verjuspælari hjá Sarpsborg sendi bóltin fyri føturnar á Gilla, sum takkaði fyri óvæntaða møguleikan, og setti bóltin hegnisliga í longra hornið. Jakob Orlov legði Brann Bergen á odda, tá 18 minuttir vóru farnir av dystinum. Sarpsborg fekk sítt mál í tíðini dómarin hevði lagt aftrat.
Samstundis, sum Brann Bergen vann, so taptu kappingarneytarnir, Odd 1-3 ímóti Tromsø á útivølli, og má Odd taka til takkar við bronsuheiðursmerkjunum.
Talan er um eitt sera gott úrslit hjá Brann Bergen, sum er uppflytarar. Nú verður at taka næsta stóra stigið, sum verður at koppa Rosenborg av norsku fótbóltstrónuni, sum verður eitt størri tak. Í hesum framtíðarætlanum er Gilli Rólantsson.
Endaliga støðan í norsku tippuliguni :
| 1 | Rosenborg | 30 | 21 | 6 | 3 | 65:25 | 69 |
| 2 | Brann Bergen | 30 | 16 | 6 | 8 | 42:27 | 54 |
| 3 | Odd | 30 | 15 | 6 | 9 | 44:35 | 51 |
| 4 | Haugesund | 30 | 12 | 10 | 8 | 47:43 | 46 |
| 5 | Molde | 30 | 13 | 6 | 11 | 48:42 | 45 |
| 6 | Sarpsborg | 30 | 12 | 9 | 9 | 35:37 | 45 |
| 7 | Strømsgodset | 30 | 12 | 8 | 10 | 44:40 | 44 |
| 8 | Viking | 30 | 12 | 7 | 11 | 33:35 | 43 |
| 9 | Aalesund | 30 | 12 | 6 | 12 | 46:51 | 42 |
| 10 | Vålerenga | 30 | 10 | 8 | 12 | 41:39 | 38 |
| 11 | Sogndal | 30 | 8 | 12 | 10 | 33:37 | 36 |
| 12 | Lillestrøm | 30 | 8 | 10 | 12 | 45:50 | 34 |
| 13 | Tromsø | 30 | 9 | 7 | 14 | 36:46 | 34 |
| 14 | Stabæk | 30 | 8 | 7 | 15 | 35:42 | 31 |
| 15 | Bodø/Glimt | 30 | 8 | 6 | 16 | 36:45 | 30 |
| 16 | Start Kristiansand | 30 | 2 | 10 | 18 | 23:59 | 16 |
