Í dag vóru seinastu dystirnir í grundspælinum í bestu svensku hondbóltsdeildini leiktir.
Pætur Mikkjalsson, Rói Ellefsen á Skipagøtu og liðfelagarnir í Hallby spældu á útivølli móti verandi meistarunum, Kristianstad.
Hallby tapti dystin 30-34. Heimaliðið var á odda 18-15 í steðginum.
Rói skoraði trý mál og legði upp til seks mál í dystinum.
Hallby endaði á ellinta og fjórðaftasta plássinum í grundspælinum við 19 stigum.
Hallby má tí spæla dystir móti fimtfremsta liðnum í næstbestu deildini, Vinslöf sum fekk 26 stig í 26 dystum. Samlaði vinnarin spælir í bestu deildini komandi kappingarár.
Í flestu førum vinnur liðið frá hægru deildini hesar dystirnar, men ikki altíð, og tí fara Pætur, Rói og liðfelagarnir í Hallby als ikki at taka lætt upp á dystirnar móti Vinslöf.
Sävehof, ið fyri langari tíð síðani hevur vunnið grundspælið vann í dag - uttan Óla Mittún á liðnum - 32-31 (18-17) á Karlskrona á útivølli.
Sävehof endaði á 41 stigum. Næstfremst er Ystad við 34 stigum.
Komandi týsdag klokkan 17.45 spælir Sävehof seinnu áttandapartsfinaluna í EHF European League móti týska liðnum, Hannover-Burgdorf í Partille. Hannover-Burgdorf vann fyrra dystin 34-30 (18-14).
