Mánadagin, ólavsøkuaftan, varð ein 31 ára gamal maður ákærdur fyri at hava flutt 3,283 kilo av hassjið inn til Føroyar.
Hann varð varðhaldsfongslaður, men kærdi dómin fyri Landsrættin, ið síðan hevur staðfest dómin. Tann 31 ára gamlæi situr nú í isolatión, og skal sita í 14 dagar tilsaman.
Sama dag, 28. juli varð eisini ein útlendingur frá Sveis, sum var á veg til Íslands tikin við fimm grammum av Marihuana. Hann varð burturvístur, við boðunum um, at hann ikki kann koma inn aftur í landið komandi árið.
Í seinastuni hevur tollvaldið havt úr at gera, og tey knapt 3,3 kiloini av hassji eru triðji stóri fongur innan ein mánað. Tilsaman er hald lagt á yvir 40 kilo av hassji frá ferðafólkið, sum eru komin við Norrønu í einum tíðarskeiði, sum eitur knapt ein mánaði.
Tann 24. juni var ein dani tikin vid 20 kilo av hassji, og nakað seinni var ein maður, sum var á veg til Íslands tikin við 19 kilo av hassji. Enn er einki nýtt um, nær nakað víðari hendir viðvíkjandi teimum.
Blakað fyri borð
Líkt er til, at tollvaldið við fonginum mánadagin avdúkaði ein sera óvanligan framferðarhátt hjá smuglarum, ið flyta hassj til Føroyar.
Av tilvild sá ein persónur, ið kom framvið keiøkinum okkurt liggja og flóta uttanfyri grótkastið við nýggju keiina, og ein speedbát sigla rundan um.
Viðkomandi helt, at hettar sá sera løgið út og setti seg í samband við tollvaldið, sum so stóð fyri manninum, tá hann kom í land í speedbátinum.
Tað vísti seg, at maðurin í speedbátinum, var tann sami, sum hevði verið fyrstur í land av Norrønu. Hann hevur eftir øllum at døma kasta eina tasku við umleið 3,3 kilo av hassiji fyri borð, og hevur síðan skunda sær í land, og í ein bát eftir taskuni.
Bergleif Brimvík, leiðari á kriminaldeildini, vil ikki siga um hettar merkir, at ein týdningarmikil háttur at flyta hassj inn til Føroya er avdúkaður. Av tí at rættarsakin er fyri afturlætnum hurðum, vil hann ikke geva nakra viðmerking, annað enn at hann váttar, at 31 ára gamli maðurin er tikin við 3,3 kilo av hassið 28. juli.
