Nýggja oljufelagið, Krafta, fer at taka kappingina upp við tey bæði gomlu oljufeløgini, Magn og Effo, um at selja olju til skip í Føroyum.
Sum vit skriva á øðrum stað her á síðuni, so er ætlanin at byggja oljugoymslu á Hulki á Strondum.
Tað eru fýra stór føroysk reiðarí, sum eiga nýggja oljufelagið saman við tveimum øðrum.
- Smyril Line eigur 20 prosent
- Framherji eigur 20 prosent
- JFK eigur 20 prosent
- Farcod eigur 20 prosent
- Rói Kalsø eigur 10 prosent
- 380 Consult v/Leif Hovgaard eigur 10 prosent
Fólkini aftan fyri nýggja oljufelagið hava áður sagt, at tað er pláss fyri fleiri enn tveimum oljufeløgum á føroyska oljumarknaðinum. Teir hava eisini sagt, at tað verður øllum samfelagnum til gagns við meiri kapping.
Nevndarformaður í nýggja oljufelagnum er fyrrverandi forstjórin í BankNordik, Árni Ellefsen. Nevndarlimir eru Jóhanna Køtlum og Rói Kalsø.
Rói Kalsø er stjóri, og Leif Hovgaard er sølustjóri. Teir hava báðir drúgvar royndir í oljuvinnuni í Føroyum og hava starvast hjá Magn samtakinum í tilsamans 27 ár.
Nýggja oljufelagið hevur eisini áður boðað frá, at oljugoymslan, ið Krafta fer at lata byggja, verður eitt íkast til tilbúgvingina í Føroyum, havandi á huga, at oljugoymslurnar í Føroyum ikki eru nóg stórar sambært tilmælinum hjá International Energy Agency, IEA.
Til oljugoymslan stendur klár veitir Krafta gassolju til skip í Føroyum og uttanlands, eins og felagið bjóðar oljumekling og ráðgeving til skip og virkir.
P/F Framinvest, sum eigur P/F Framherja, eigur eisini í oljufelagnum Effo, har ognarluturin er 5 prosent. P/F Kolon, sum P/F Tjaldur eigur, eigur meirilutan, 52 prosent, í P/F Effo.
P/F Orkufelagið eigur allan partapeningin í P/F Magn. Sambært Skráseting Føroyar sæst bara, at íslendska felagið, SKEL Fjárfestinafélag eigur 48 prosent av partapeninginum. Upplýst verður ikki, hvør eigur hini 53 prosentini av partapeninginum.
